ტურიზმისა და მოგზაურობის მსოფლიო საბჭოს (WTTC) ბოლო ანგარიშის თანახმად, მასშტაბური კრიზისები ხშირად ინდუსტრიის ტრანსფორმაციისა და ზრდის კატალიზატორი ხდება. კვლევამ, რომელმაც ბოლო 40 წლის განმავლობაში მომხდარი 100 უმსხვილესი კრიზისი გააანალიზა, აჩვენა, რომ არცერთი ტურისტული მიმართულება არ განიცდის გრძელვადიან კოლაფსს; პირიქით, ეფექტური სახელმწიფო რეგულირების პირობებში, მაჩვენებლები არა მხოლოდ აღდგება, არამედ აჭარბებს კრიზისამდელ პიკურ მნიშვნელობებს.
ანგარიშში მოყვანილია კონკრეტული მაგალითები: ტუნისმა 2015 წლის ტერაქტების შემდეგ, როდესაც ტურისტული ნაკადი 25%-ით შემცირდა, სულ რაღაც სამ წელიწადში ვიზიტორთა რეკორდულ რაოდენობას (8,3 მლნ) უმასპინძლა. ანალოგიურად, ნეპალმა 2015 წლის მიწისძვრის შემდეგ ორ წელიწადში აღადგინა პოზიციები, ხოლო ტაილანდმა 2004 წლის ცუნამისგან მიყენებული ზიანი 24 თვეზე ნაკლებ დროში დაძლია. COVID-19-ის პანდემიის შემდეგაც, საერთაშორისო მოგზაურობების რაოდენობა 2024 წელს პანდემიამდელ ნიშნულს დაუბრუნდა, ხოლო 2025 წელს ტურისტების დანახარჯებმა რეკორდულ 2,02 ტრილიონ დოლარს მიაღწია.
WTTC-ის მონაცემებით, გასულ წელს ტურიზმის წვლილმა მსოფლიო მშპ-ში 11,6 ტრილიონი დოლარი შეადგინა, რაც გლობალური ეკონომიკის 9,8%-ია. სექტორში დასაქმებულია 366 მილიონი ადამიანი, რაც ნიშნავს, რომ მსოფლიოში ყოველი მეცხრე მუშაკი ტურიზმის სფეროშია დაკავებული. ექსპერტები ხაზს უსვამენ, რომ აღდგენის სისწრაფე დამოკიდებულია არა კრიზისის მასშტაბზე, არამედ ხელისუფლების რეაქციაზე — ბიზნესის დროულ მხარდაჭერაზე, ავიამიმოსვლის შენარჩუნებასა და აქტიურ მარკეტინგულ კამპანიებზე.
როგორც WTTC-ის პრეზიდენტმა, გლორია გევარამ აღნიშნა, მდგრადობა ტურიზმის „დნმ-შია“. მისი თქმით, ადამიანები ყველაზე რთული პერიოდების შემდეგაც აგრძელებენ მოგზაურობას, მიმართულებები კი კრიზისებიდან უფრო გაძლიერებულები გამოდიან. მთავარი ფაქტორი სწრაფი და კოორდინირებული მოქმედებაა, რაც ინდუსტრიის დინამიკურ აღდგენას განაპირობებს.
