პოლონური ავიაკომპანია LOT გრძელმაგისტრალური Boeing 787-ების სალონებს რადიკალურად განაახლებს. აღნიშნული საჰაერო ხომალდებს კი ავიაკომპანია ამერიკასა და აზიაში ფრენისთვის იყენებს.
განახლება მოიცავს ახალი სავარძლებისა და გასართობი სისტემის მონტაჟს, ასევე აღჭურვილობას, რომელიც მგზავრებს ფრენის დროს ინტერნეტთან წვდომის საშუალებას მისცემს. LOT ამჟამად არ უზრუნველყოფს ამ სერვისს, რადგან მის თვითმფრინავებს არ აქვთ სატელიტური მიმღებები.
ირკვევა, რომ ამ ხომალდებში ცვლილებებს ყველაზე მეტად ბიზნეს კლასის მგზავრები შეამჩნევენ. ადგილების განლაგება აქ შეიცვლება 2+2+2-დან 1+2+1-მდე. სავარძლების ახალი განლაგება ყველა მგზავრს ბილიკზე წვდომის საშუალებას მისცემს. ახალი სავარძლები განთავსდება პატარა კაბინებში, რომლებიც სალონის დანარჩენი ნაწილისგან გამოყოფილია მოძრავი ტიხრებით.
ახალ გასართობ სისტემას ექნება ეკრანები 4k გარჩევადობით. ბიზნეს კლასში მათი დიაგონალი იქნება 17,3 ინჩი, პრემიუმ ეკონომ და ეკონომ კლასებში – 13,3 ინჩი. გასართობი სისტემა მგზავრებს საშუალებას მისცემს დააკავშირონ უკაბელო ყურსასმენები ეკრანებთან.
LOT აღნიშნავს, რომ ახალი სალონის დიზაინის შემუშავებისას გათვალისწინებული იყო ავიაკომპანიის 95-წლიანი ისტორია და პოლონური სტუმართმოყვარეობის სული, მაგრამ ახალი სტილი დარჩა თანამედროვე.
ღრმა ლურჯი ფერი სიმბოლოა LOT ბრენდის, ხოლო სპილენძის ელფერი მიუთითებს პოლონეთის მზის სითბოზე.
პირველ ეტაპზე პოლონური ავიაკომპანია Boeing 787 თვითმფრინავის სალონებს 787-8 ვერსიით განაახლებს. პირველი მგზავრები განახლებული თვითმფრინავით 2026 წელს გაფრინდებიან.
