საქართველოს ავიაბაზარზე შემოსვლიდან თითქმის 6 წლის თავზე Wizz Air-ი 1.5 მლნ-მდე მგზავრს მოემსახურა. ეკონომიკისა და მდგრადი განვითარების სამინისტროს „საქართველოს აეროპორტების გაერთიანების“ ინფორმაციით, Wizz Air-მა ქუთაისის საერთაშორისო აეროპორტის მიმართულებით ავიარეისების განხორციელება 2012 წლის სექტემბრიდან დაიწყო და დღემდე (2018 წლის ნოემბრის ჩათვლით) აეროპორტის გავლით სულ 1 მლნ 483 ათას 43 მგზავრს მოემსახურა. ცხადია, რომ წლის ბოლომდე კომპანიის მიერ გადაყვანილ მგზავრთა რაოდენობა კიდევ უფრო გაიზრდება.
გასული წლების მიხედვით Wizz Air-ის მიერ ქუთაისის აეროპორტის მეშვეობით გადაყვანილი მგზავრთა სტატისტიკა ასე გამოიყურება:
2012 წელი – 11,214 მგზავრი;
2013 წელი – 163,737 მგზავრი;
2014 წელი – 190,475 მგზავრი;
2015 წელი – 116,835 მგზავრი;
2016 წელი – 155,045 მგზავრი;
2017 წელი – 223,656 მგზავრი;
2012 წლის სექტემბერში Wizz Air-მა ქუთაისის მიმართულებით ოპერირება კიევი-ქუთაისის საჰაერო ხაზით დაიწყო.
2013 წელს ავიაკომპანიამ დაამატა 4 ახალი მიმართულება: ხარკოვი, დონეცკი, ვარშავა და კატოვიცე;
არსებულ მიმართულებებს 2014 წელს დაემატა: ვილნიუსი და ბუდაპეშტი;
2015 წელს უკრაინაში განვითარებული მოვლენების ფონზე Wizz Air-მა უკრაინიდან ქუთაისის მიმართულებით ავიარეისები შეწყვიტა და ქუთაისის საერთაშორისო აეროპორტში ოპერირებას ევროპის 4 მიმართულებიდან (ვარშავა, ბუდაპეშტი, ვილნიუსი, კატოვიცე) ახდენდა.
2016 წლის სექტემბერში Wizz Air-მა ქუთაისის საერთაშორისო აეროპორტში საკუთარი ბაზა გახსნა, სადაც ბაზირებდა 1 ბორტით და 7 ახალი ავიამიმართულებით (მილანი, სალონიკი, ლარნაკა, ბერლინი, დორტმუნდი, მემინგენი, სოფია). 2017 წელს Wizz Air-მა არსებულ მიმართულებას დაამატა ლონდონი. 2018 წელს “ლოუკოსტერმა” ქუთაისის აეროპორტში მეორე ბორტის ბაზირება მოახდინა და ოპერირება 5 ახალი ავიამიმართულებით (ათენი, რომი, პარიზი, პრაღა, ბარსელონა) დაიწყო.
2018 წლის მონაცემებით, Wizz Air-ი ქუთაისიდან ასრულებს ფრენებს ევროპის 14 ქვეყნის 20 მიმართულებით:
- ავსტრია: ვენა;
- გერმანია: ბერლინი, დორტმუნდი, მემინგენი (მიუნხენი);
- დიდი ბრიტანეთი: ლონდონი;
- ესპანეთი: ბარსელონა;
- იტალია: მილანი, რომი;
- კვიპროსი: ლარნაკა;
- ლატვია: რიგა;
- ლიტვა: ვილნიუსი;
- საბერძნეთი: ათენი, სალონიკი;
- საფრანგეთი: პარიზი;
- უნგრეთი: ბუდაპეშტი;
- პოლონეთი: ვარშავა, ვროცლავი, კატოვიცე;
- რუმინეთი: ბუქარესტი;
- ჩეხეთი: პრაღა;
შეგახსენებთ, რომუნგრული დაბალბიუჯეტური ავიაკომპანია Wizz Air-ი 2003 წელს დაარსდა. ავიაკომპანიამ პირველი რეისი 2004 წლის 19 მაისს, კატოვიცედან განახორციელა. ამ დროისათვის ავიაკომპანიის საჰაერო ფლოტი მოიცავს 96 ერთეულ Airbus A320 და A321 ტიპის საჰაერო ხომალდებს.
