ვიეტნამში ქვეყნის სატრანსპორტო ინფრასტრუქტურისთვის უმნიშვნელოვანესი პროექტის – ჰანოისა და კუანგინინის დამაკავშირებელი პირველი რეგიონთაშორისი მაღალსიჩქარიანი რკინიგზის მშენებლობა დაიწყო. პროექტის საძირკვლის ჩაყრის ცერემონიას რესპუბლიკის პრემიერ-მინისტრი ლე მინ ხუნგი დაესწრო, რომელმაც ხაზი გაუსვა ხაზის ეროვნულ მნიშვნელობას. მოლოდინების თანახმად, ახალი მაგისტრალი ორ ქალაქს შორის მგზავრობის დროს 23 წუთამდე შეამცირებს, რაც არსებულ მაჩვენებელზე 5-7-ჯერ სწრაფია.
პროექტს ახორციელებს კომპანია VinSpeed-ი, რომელიც Vingroup-ის შვილობილი საწარმოა. ინვესტიციის საერთო მოცულობა 147 ტრილიონ დონგს (დაახლოებით 5,6 მილიარდი დოლარი) აღემატება. 120 კილომეტრიანი მონაკვეთის მშენებლობა, რომელიც გაივლის ჰანოის, ბაკნინს, ჰაიფონსა და კუანგინინს, 2028 წლის ბოლოსთვის უნდა დასრულდეს. აღსანიშნავია, რომ ეს VinSpeed-ის მეორე მსგავსი ინიციატივაა ხოშიმინში მიმდინარე ბენ თანხი-კან გიოს სარკინიგზო პროექტის შემდეგ.
ახალი სარკინიგზო ხაზი იქნება სრულად ელექტრიფიცირებული, ორლიანდაგიანი და სტანდარტული ზომის (1435 მმ). მატარებლების მაქსიმალური სიჩქარე საათში 350 კილომეტრს მიაღწევს. მარშრუტი ჰანოის კო ლოს სადგურიდან დაიწყება და კუანგინინის ჰალონგის სადგურზე დასრულდება. პროექტი ითვალისწინებს ახალი თაობის მაღალსიჩქარიანი მატარებლებისა და Siemens Mobility-ის უახლესი სასიგნალო და საკომუნიკაციო სისტემების გამოყენებას.
ადგილობრივი ხელისუფლების წარმომადგენლებმა ამ წამოწყებას „მეგაპროექტი“ უწოდეს, რომელიც ასახავს ქვეყნის ძლიერ საინვესტიციო პოტენციალსა და კერძო სექტორის მზარდ როლს ეროვნული ინფრასტრუქტურის განვითარებაში. პროექტი არა მხოლოდ გააუმჯობესებს კავშირს რეგიონებს შორის, არამედ მნიშვნელოვან სტიმულს მისცემს ვიეტნამის ეკონომიკურ მომავალს.
