ამ ეტაპზე 17 ივნისის თბილისი-დორტმუნდის რეისზე ეკონომ კლასის ყველა ბილეთი დაჯავშნილია, ამის შესახებ AviaNews-ს ავიაკომპანია Georgian Airways-ში განუცხადეს, რომელმაც გერმანიაში EURO-2024-ზე ეროვნული ნაკრების თამაშებზე დასასწრებად ჩარტერული ფრენების ავიაბილეთების გაყიდვები გუშინ გახსნა და ერთი გზის ღირებულება, ეკონომ კლასში 295 ევროდან დააანონსა.
„მაღალი მოთხოვნიდან გამომდინარე, ამ ეტაპზე 17 ივნისის თბილისი-დორტმუნდის რეისზე ეკონომ კლასის ყველა ბილეთი დაჯავშნილია. შესაძლებელია გარკვეულ რაოდენობაზე, რომლის გამოსყიდვა არ მოხდა, მოიხსნას ჯავშანი და ისევ ხელმისაწვდომი გახდეს. თვალი ადევნეთ ავიაკომპანიის ვებ-გვერდს“, – აცხადებენ Georgian Airways-ში.
არსებული განრიგის მიხედვით, Georgian Airways-ი პირდაპირ ფრენებს შესრულებს თბილისიდან დორტმუნდში 17 ივნისს (გამოფრენა დორტმუნდიდან თბილისში 19 ივნისს), თბილისიდან ჰამბურგში – 21 ივნისს (გამოფრენა ჰამბურგიდან თბილისში 23 ივნისს), თბილისიდან დუსელდორფში 25 ივნისს (გამოფრენა დუსელდორფიდან თბილისში 27 ივნისს).
Georgian Airways-ში განმარტავენ, რომ პირდაპირი რეისები შესრულდება მგზავრებისთვის მატჩებზე დასასწრებად კომფორტულ დროს.
ავიაბილეთების გაყიდვა უკვე დაიწყო ავიაკომპანიის ვებ-საიტზე, გაყიდვების ოფისებსა და პარტნიორ სააგენტოებში.
„ავიაკომპანია Georgian Airways-ი კიდევ ერთხელ ულოცავს საქართველოს ეროვნულ ნაკრებს და მის გულშემატკივრებს ისტორიულ გამარჯვებას! Georgian Airways-ი შეასრულებს სპეციალურ პირდაპირ ფრენებს თბილისიდან გერმანიის იმ ქალაქებში, სადაც გაიმართება საქართველოს საფეხბურთო ეროვნული ნაკრების თამაშები ევროპის ჩემპიონატზე იმისთვის, რომ რაც შეიძლება მეტმა გულშემატკივარმა შეძლოს მატჩებზე დასწრება“, – აღნიშნული იყო რამდენიმე დღის უკან ავიაკომპანიის მიერ გავრცელებულ განცხადებაში.
ერთად ვუგულშემატკივროთ ეროვნულ ნაკრებს!
