საქართველოსა და სერბეთს შორის შესაძლოა პირდაპირი ავიარეისები დაინიშნოს. აღნიშნულ საკითხზე საქართველოს პარლამენტის თავმჯდომარემ ირაკლი კობახიძემ სერბეთის რესპუბლიკაში ვიზიტის ფარგლებში, ქვეყნის პრეზიდენტთან ალექსანდრ ვუჩიჩთან შეხვედრისას ისაუბრა.
როგორც შეხვედრის დასრულების შემდეგ, პარლამენტის თავმჯდომარემ ჟურნალისტებს განუცხადა, დიპლომატიური წარმომადგენლობის გახსნა და პირდაპირი საჰაერო მიმოსვლა ორმხრივი ურთიერთობის შემდგომ გაღრმავებაში მნიშვნელოვან წვლილს შეიტანს. მისივე ინფორმაციით, სერბეთის დიპლომატიური წარმომადგენლობა საქართველოში უახლოეს თვეებში გაიხსნება.
„პრეზიდენტმა მიიღო გადაწყვეტილება, რომ საქართველოში გაიხსნება სერბეთის რესპუბლიკის დიპლომატიური წარმომადგენლობა. ასევე, მან დღესვე გასცა დავალება, რომ დაიწყოს მუშაობა სერბეთსა და საქართველოს შორის პირდაპირი რეისების დაწყების შესახებ. ეს ძალიან მნიშვნელოვანია და რა თქმა უნდა, ეს ყველაფერი ხელს შეუწყობს სერბეთსა და საქართველოს შორის ურთიერთობების შემდგომ გაღრმავებას. ეს არის სერბეთის პრეზიდენტთან ჩვენი საუბრის ძალიან მნიშვნელოვანი შედეგი“,- აღნიშნა ირაკლი კობახიძემ.
