„მინდა საზოგადოებამ იცოდეს, რომ ჩვენ ვმუშაობთ ინტენსიურად იმისთვის, რომ უახლოესი დღეების და კვირების განმავლობაში იყოს კონკრეტულად გაწერილი ქართულ ავიაკომპანია Georgian Airways-თან ერთად ის მიმართულებები, რა მიმართულებებიდანაც მოხდება საქართველოს მოქალაქეების ეტაპობრივი გამოყვანა”, – განაცხადა საგარეო საქმეთა მინისტრმა, დავით ზალკალიანმა კორონავირუსთან დაკავშირებით საკოორდინაციო საბჭოს სხდომის შემდეგ განაცხადა.
ზალკანიანის განმარტებით, საქართველოს მთავრობა და საგარეო საქმეთა სამინისტრო, პრემიერ-მინისტრის დავალებით, ინტენსიურად მუშაობს უცხოეთის ქვეყნებიდან ჩვენი მოქალაქეების სამშობლოში დასაბრუნებლად.
მინისტრის თქმით, უკვე თვენახევარია, რაც საგარეო საქმეთა სამინისტროს ჩართულობით და პრემიერ-მინისტრის დავალებით 3 ათასამდე მოქალაქის სამშობლოში დაბრუნება მოხერხდა.
“საზოგადოებას მინდა ვაცნობო, რომ შედგენილია 2 კვირის გრაფიკი. დღეს უკვე შედგება რეისი თბილისი-ბერლინი-თბილისი, რომელიც სამშობლოში დააბრუნებს ჩვენს მოქალაქეებს, რომლებიც ამ დროისთვის ბერლინში არიან კონცენტრირებული. საელჩოების მეშვეობით მოხდა მათი თავმოყრა ბერლინში და სამშობლოში დაბრუნება.
ასევე, ხვალ განხორციელდება ბერძნული ავიაკომპანია „ეგეოსის“ ავიახაზების მიერ თბილისის მიმართულებით რეისი, რომლითაც ისინი ჩამოიყვანენ საქართველოს მოქალაქეებს, დააბრუნებენ საბერძნეთიდან და საქართველოდან წაიყვანენ თავის მოქალაქეებს.
26 მარტს განხორციელდება თბილისი-ვენა-თბილისის რეისი, ხოლო 31 მარტს განხორციელდება თბილისი-ამსტერდამი-თბილისის რეისი.
3 აპრილს განხორციელდება თბილისი-ვარშავა-თბილისის რეისი, ხოლო 7 აპრილს განხორციელდება თბილისი-ათენი-თბილისის რეისი. ასევე, 10 აპრილს განხორციელდება თბილისი-ლარნაკა-თბილისის რეისი.
ეს არის ის უახლოესი დღეების განრიგი, რისი შესაძლებლობაც ამ ვითარებაში არსებობს, რომ ჩვენ ეტაპობრივად გამოვიყვანოთ ჩვენი მოქალაქეები.
რა თქმა უნდა ჩვენ ვმუშაობთ შემდგომი რეისების დაგეგმვაზე, რომ ეტაპობრივად მოხდეს ჩვენი მოქალაქეების დაბრუნება.
ასევე მინდა საზოგადოებას ვაცნობო, რომ პრემიერ მინისტრის დავალებით და ეს იქნება მკაცრად გაკონტროლებული, რომ ბილეთის თანხა არ აღემატებოდეს 199 ევროს!“, – განაცხადა დავით ზალკალიანმა.
