ქუთაისის საერთაშორისო აეროპორტში ყველაზე მოთხოვნადი მიმართულება ვენაა. როგორც ეკონომიკისა და მდგრადი განვითარების სამინისტროს შპს “საქართველოს აეროპორტების გაერთიანებაში” AviaNews-ს განუცხადეს, 2019 წლის იანვარ-ივნისის მონაცემებით, ქუთაისის საერთაშორისო აეროპორტიდან ყველაზე მოთხოვნადი ვენა იყო. 6 თვის მაჩვენებლებით, ვენის შემდეგ ყველაზე მოთხოვნადი კი ვარშავას მიმართულებაა.
“საქართველოს აეროპორტების გაერთიანების” სტატისტიკური მონაცემების მიხედვით, ქუთაისის საერთაშორისო აეროპორტიდან ყველაზე მოთხოვნადი TOP-5 მიმართულება ასე გამოიყურება:
- ვენა;
- ვარშავა;
- ვილნიუსი;
- კატოვიცე;
- პრაღა;
აღსანიშნავია, რომ ყველა ამ მიმართულებაზე ქუთაისის საერთაშორისო აეროპორტიდან რეისებს დაბალბიუჯეტიანი ავიაკომპანია Wizz Air-ი ასრულებს.
2019 წლის იანვარ-ივნისში ქუთაისის საერთაშორისო აეროპორტმა, რეგულარული და არარეგულარული რეისებით, 366 ათას 62 მგზავრი გაატარა, 2018 წლის ანალოგიურ პერიოდში კი – 234 ათას 743 მგზავრი. შესაბამისად, 2019 წლის პირველ ნახევარში ქუთაისის საერთაშორისო აეროპორტში მგზავრთნაკადის 56%-იანი მატება დაფიქსირდა.
