ინდონეზიის კუნძულ ბალიზე უჩვეულო სასტუმრო გაჩნდა – კერძო რეაქტიული ვილა, რომელიც შექმნილია Boeing 737-ის ფიუზელაჟის საფუძველზე და მდებარეობს ზღვის დონიდან 150 მ სიმაღლეზე.
ადრე ადგილობრივი ავიაკომპანიის აღნიშნული თვითმფრინავი მთელ ინდონეზიაში დაფრინავდა, შემდეგ კი, მწყობრიდან გამოვიდა და კლდის კიდეზე გადაიყვანეს და ამ ადგილას სასტუმროდ გადააკეთეს.
სასტუმრო აპარტამენტები დააპროექტა Geometrium Studio-მ. აქ დამონტაჟდა სავენტილაციო და კონდიცირების ახალი სისტემა და ყველა კომუნიკაცია დამალულია სატვირთო განყოფილებაში. ავეჯი შეკვეთით იყო დამზადებული, რადგან დიზაინერებს დავალება ჰქონდათ მისი ჰარმონიულად მორგება ოთახის მოხრილ კედლებში. ინტერიერის გაფორმებისას გამოყენებული იყო ბუნებრივი ხე და ბეტონი ღია ფერებში, რამაც შესაძლებელი გახადა სივრცის ვიზუალურად გაფართოება.
Private Jet Villa-ის შიდა ინტერიერში წვდომა შესაძლებელია კიბეებით, რომელიც მიდის სამზარეულო-მისაღები ოთახისკენ, ფიუზელაჟის ცენტრალურ ნაწილში. თვითმფრინავის ერთ-ერთ ფრთაზე, პირდაპირ კლდეზე განთავსებულია ტერასა ოკეანის ხედით.
თვითმფრინავის სასტუმროს ცენტრალური ტერიტორია დაკავშირებულია ორ საძინებელთან. პირველი განთავსებულია კაბინაში, სადაც არის ჯაკუზი და ორადგილიანი საწოლი. უკანა მხარეს არის კიდევ ერთი საძინებელი სველი წერტილით.
ხომალდის ორიგინალური კარები შენარჩუნებულია.
სტუმრებს შეუძლიათ აპარტამენტებში მანქანით ან ვერტმფრენით მოხვედრა – იქვე მდებარეობს სპეციალური პლატფორმა.
უნიკალური ობიექტი ჯერ კიდევ 2020 წელს იყო ჩაფიქრებული და საბოლოოდ დასრულდა 2023 წლის ბოლოს. განთავსების ობიექტში ღამისთევის ფასები 2 ათასი დოლარიდან 5 ათას დოლარამდე მერყეობს, რაც დამოკიდებულია წელიწადის დროზე და ყოფნის ხანგრძლივობაზე.
