აჭარის ავტონომიური რესპუბლიკის მთავრობა აქტიურად იყო ჩართული სატვირთო ავტომობილების მძღოლებისთვის თურქეთში ტრანზიტული გადაზიდვებისთვის საჭირო პროცედურების დაჩქარების პროცესში. მთავრობის წარმომადგენლები მთელი დღის განმავლობაში იმყოფებოდნენ შემოსავლების სამსახურის შენობასთან სატვირთო ავტომობილების მძღოლების საპროტესტო აქციაზე, ჰქონდათ მუდმივი კომუნიკაცია როგორც სახმელეთო ტრანსპორტის სააგენტოსთან, ისე თურქულ მხარესთან.
საპროტესტო აქცია საბოლოოდ შეწყდა სახმელეთო ტრანსპორტის სააგენტოს ხელმძღვანელთან, მიხეილ ხმალაძესთან შეხვედრის შემდეგ, რომელმაც მძღოლებს თურქეთში ტრანზიტული გადაზიდვებისთვის საჭირო ნებართვების გაცემის შესახებ საბოლოო და დადასტურებული ინფორმაცია მიაწოდა.
“მინდა გითხრათ, რომ ორ დღეში თურქეთიდან ნებართვები ჩამოვა, რომელსაც ბათუმის ოფისში აიღებთ. თავდაპირველად 1500 ნებართვა იქნება, შემდეგ კი ამავე რაოდენობის დაემატება. მინდა დაგარწმუნოთ, რომ პრობლემა მოგვარებულია“,- განუცხადა აქციის მონაწილეებს სახმელეთო ტრანსპორტის სააგენტოს ხელმძღვანელმა მიხეილ ხმალაძემ.
საერთაშორისო გადაზიდვებს სატვირთო ავტომობილების მძღოლები ორი თვეა ვერ ახორციელებენ, რადგან თურქეთის მიმართულებით, მეზობელ ქვეყანას შესაბამის ნებართვების გაცემა შეწყვეტილი ჰქონდა.
სახმელეთო ტრანსპორტის და აჭარის მთავრობის წარმომადგენლების ინფორმაციით, ორ დღეში სატვირთო ავტომობილების მძღოლებისთვის თურქეთში ტრანზიტული გადაზიდვებისთვის საჭირო ნებართვის გაცემა დაიწყება და პრობლემა ეტაპობრივად აღმოიფხვრება.
