თვითაღიარებული აფხაზეთი მარტ-აპრილში რუსეთთან სამთავრობოთაშორისო შეთანხმების გაფორმებას ვარაუდობს, რაც სოხუმში აეროპორტის მშენებლობის დაწყების შესაძლებლობას იძლევა, განაცხადა თვითგამოცხადებული აფხაზეთის პრეზიდენტმა ასლან ბჟანიამ.
მისი თქმით, პოტენციურმა ინვესტორმა უკვე დაასრულა საპროექტო და კვლევითი სამუშაოები. ახლა პროექტი სახელმწიფო ექსპერტიზის ეტაპს გადის, რომელიც მიმდინარე წლის აპრილში უნდა დასრულდეს.
„საჰაერო მიმოსვლის აღდგენის საკითხი ძალიან მნიშვნელოვანია“, – განაცხადა ბჟანიამ, „ამ ორი თვის განმავლობაში – მარტსა და აპრილში – ჩვენ უნდა მოვაწეროთ ხელი სამთავრობათაშორისო შეთანხმებას, რომელიც გვიხსნის გზას აეროპორტში მშენებლობისთვის.”
ამ პროექტისთვის თვითაღიარებული აფხაზეთის თვითგამოცხადებულ რესპუბლიკას რამდენიმე მილიარდი რუბლის მოძიება მოუწევს, რაც არ აქვს.
„ჩვენ ვეძებთ ინვესტორს, რომელიც თავის თავზე აიღებს ამ ყველა ხარჯს – როგორც აეროპორტის კომპლექსისთვის, ასევე ასაფრენი ბილიკისთვის, და იმ ინფრასტრუქტურული ობიექტების რეაბილიტაციისთვის, რომლებიც სახელმწიფოს ეკუთვნის“, – განაცხადა ბჟანიამ.
სოხუმის აეროპორტის ფუნქციონირების აღდგენის საკითხი განიხილეს 2020 წლის ნოემბერში სოჭში რუსეთისა და თვითაღიარებული აფხაზეთის რესპუბლიკის პრეზიდენტების ვლადიმერ პუტინისა და ასლან ბჟანიას შეხვედრაზე. მანამდე ბჟანიამ განაცხადა, რომ სოხუმის აეროპორტის მუშაობის განახლებას 4,5 მილიარდი რუბლი დასჭირდება. მან ასევე განაცხადა, რომ აეროპორტის აღდგენის საპროექტო სამუშაოები 2022 წლის შემოდგომაზე მზად იქნება.
აეროპორტი, რომელიც აფხაზეთის დედაქალაქიდან 18 კილომეტრში მდებარეობს, სამოქალაქო ავიაციის საერთაშორისო ორგანიზაციის (ICAO) გადაწყვეტილებით ქართულ-აფხაზური ომის დასრულების შემდეგ არ ფუნქციონირებს. საბჭოთა პერიოდში ტერმინალი ზაფხულში დღეში 5000-მდე, ზამთარში კი 1000-მდე მგზავრს ემსახურებოდა. აეროპორტის ასაფრენი ბილიკის სიგრძე 3,6 კმ-ია, რაც შესაძლებელს ხდის თითქმის ყველა ტიპის სამოქალაქო თვითმფრინავის მიღებას როგორც ზღვიდან, ასევე მთიდან.
