ხუთი წლის განმავლობაში, 2025 წლიდან, ვილნიუსის აეროპორტს სიმბოლურად კომპოზიტორისა და მხატვრის მიკალოიუს კონსტანტინას ჩიურლიონისის სახელი მიენიჭება.
ლიეტუვას მთავრობის ეს გადაწყვეტილება ემთხვევა ლიეტუველი მხატვრისა და კომპოზიტორის დაბადებიდან 150 წლის იუბილეს და მისი შემოქმედებისა და მემკვიდრეობის პოპულარიზაციას ისახავს მიზნად.
სამართლებრივ აქტებში, რეესტრებსა და საინფორმაციო სისტემებში აეროპორტის ოფიციალური სახელწოდება, ასევე საერთაშორისო კოდები და აბრევიატურები უცვლელი დარჩება.
ტრანსპორტისა და კავშირგაბმულობის სამინისტრომ აეროპორტისთვის სახელის სრულად გადარქმევის წინადადებას მხარი არ დაუჭირა.
სამინისტრომ ხაზგასმით აღნიშნა, რომ აეროპორტის სახელის შეცვლამ შეიძლება გამოიწვიოს მნიშვნელოვანი ადმინისტრაციული და ფინანსური ხარჯები, ასევე დისკომფორტს შექმნის ფრენების ძიებაში მყოფი მგზავრებისთვის. აეროპორტის ოპერატორი კომპანიის შეფასებით, სრული სახელის გადარქმევის ღირებულება 500 000-დან 1 მილიონ ევრომდე მერყეობს.
