საერთაშორისო საჰაერო ტრანსპორტის ასოციაციამ (IATA) გამოაქვეყნა ანგარიში, რომელშიც 2024 წლის ყველაზე პოპულარული და უჩვეულო ტურისტული მიმართულებებია დასახელებული. როგორც CNN იტყობინება, მოგზაურები სულ უფრო ხშირად ირჩევენ ნაკლებად ცნობილ, თუმცა შთამბეჭდავ ადგილებს.
ყველაზე უჩვეულო მიმართულებები
ჰალფეტი, თურქეთი: ეს უნიკალური ქალაქი ტურისტებს იმით იზიდავს, რომ კაშხლის აშენების შემდეგ მისი ნაწილი წყალქვეშ მოექცა, თუმცა ქალაქი კვლავ აგრძელებს სიცოცხლეს. თურქეთში მოხვედრა უვიზოდ და შედარებით დაბალ ფასად არის შესაძლებელი.
ანგოლა: სამხრეთ აფრიკის ეს ქვეყანა, მრავალწლიანი იზოლაციის შემდეგ, თავის ბუნებრივ სილამაზეს ტურისტებს უხსნის. მიუხედავად იმისა, რომ ბილეთების ფასი მაღალია, ქვეყანაში მოსანახულებლად სავიზო შეზღუდვები არ არსებობს.
ჩუნკინი, ჩინეთი: სამხრეთ-დასავლეთ ჩინეთის ეს ქალაქი მრავალდონიანი დაგეგმარების გამო „8D ქალაქის“ სახელით არის ცნობილი. აქ მატარებლები პირდაპირ საცხოვრებელი სახლების გავლით მოძრაობენ, რაც დიდ ინტერესს იწვევს. მიუხედავად იმისა, რომ ჩინეთში შესვლას ვიზა სჭირდება, მისი მიღება მარტივია, ხოლო სამომავლოდ უვიზო რეჟიმის შემოღებაც განიხილება.
IATA-ს მონაცემებით, 2024 წელს საჰაერო გადაზიდვების მოცულობით ლიდერი ქვეყნები გახდნენ:
აშშ: 876 მილიონი მგზავრი, ძირითადად შიდა რეისებით.
ჩინეთი: 741 მილიონი ადამიანი, რაც 2023 წელთან შედარებით 18,7%-იან ზრდას აჩვენებს.
დიდი ბრიტანეთი: 261 მილიონი მგზავრი.
ესპანეთი: 241 მილიონი მგზავრი.
ყველაზე პოპულარული მარშრუტების უმრავლესობა აზია-წყნარი ოკეანის რეგიონში მდებარეობს. ლიდერი გახდა შიდა რეისი სამხრეთ კორეაში:
სეული — ჩეჯუს კუნძული: ამ მარშრუტით 13 მილიონზე მეტმა ადამიანმა ისარგებლა.
ნიუ-იორკი — ლოს-ანჯელესი: ყველაზე პოპულარული მარშრუტი ჩრდილოეთ ამერიკაში (2,2 მილიონი მგზავრი).
ბარსელონა — პალმა-დე-მალიორკა: ევროპული ლიდერი (2 მილიონი მგზავრი).
ბოგოტა — მედელინი: ყველაზე პოპულარული მარშრუტი ლათინურ ამერიკაში (3,8 მილიონი მგზავრი).
კეიპტაუნი — იოჰანესბურგი: ყველაზე დატვირთული მარშრუტი აფრიკაში (3,3 მილიონი მგზავრი).
