კომპანია TAV Georgia ფრენის სიხშირის გაზრდასთან დაკავშირებით მოლაპარაკებებს რამდენიმე ავიაკომპანიასთან აწარმოებს. თბილისისა და ბათუმის თბილისისა და ბათუმის საერთაშორისო აეროპორტების ოპერატორს ბაზარზე ახალი ავიაკომპანიების შემოყვანაც სურს.
„ბიზნესპარტნიორთან“ TAV Georgia-ს გენერალური მენეჯერის მოადგილე, თეა ზაქარაძე აცხადებს, რომ ამ პროცესს ხელი ბათუმის აეროპორტში გაფართოების პროექტმაც უნდა შეუწყოს.
„მიმდინარე წლის ზაფხულში 2019 წლის ზაფხულთან შედარებით მგზავრთნაკადის 50%-მდე აღდგენას ველოდებით. ეს ძალიან მნიშვნელოვანია. ასევე ველოდებით ახალ ავიაკომპანიებს. მოლაპარაკებებს ყველა არსებულ ავიაკომპანიასთან ვაწარმოებთ. ზაფხულიდან სიხშირეებიც იზრდება და ახალი ავიაკომპანიებიც შემოდიან ბაზარზე. ამ ეტაპზე, 1-ელი აპრილიდან ბათუმის საერთაშორისო აეროპორტში კვირაში 30-მდე რეისი შესრულდება და 12 ავიაკომპანია იფუნქციონირებს. ამ ეტაპზე ისრაელიდან 3 ავიაკომპანია დაფრინავს და სრულდება საკმაოდ ბევრი რეისი, ეს მისასალმებელია. ასევე დაფრინავს Turkish Airlines, უკრაინიდან კიდევ რამდენიმე ავიაკომპანია, ოპერირებას იწყებს Pegasus-ი.
ველოდებით, რომ კიდევ უფრო პოპულარული გახდება ბათუმის საერთაშორისო აეროპორტი. ყველაზე მნიშვნელოვანი ტურისტული სეგმენტი ჩვენთვის ისრაელია, რაც პირველივე დღეებიდან აისახა ბათუმზე“,- განაცხადა ზაქარაძემ.
