ტაილანდმა ტურისტებისთვის საპილოტე პროგრამა, TouristDigiPay, აამოქმედა, რომელიც მათ კრიპტოვალუტით შესყიდვების განხორციელების საშუალებას აძლევს. სისტემა სატესტო რეჟიმში 18 აგვისტოდან მუშაობს და მისი წარმატების შემთხვევაში, მუდმივი გახდება.
პროგრამის ფარგლებში, ტურისტებს ბიტკოინით ან ეთერით პირდაპირი გადახდა არ შეუძლიათ. მათ მოუწევთ ანგარიშის გახსნა აკრედიტებულ კომპანიებში, რისთვისაც მკაცრი ვინაობის დადასტურებაა საჭირო.
ამის შემდეგ, ტურისტებს მიეწოდებათ ელექტრონული საფულე, რომლის შევსებაც კრიპტოვალუტით იქნება შესაძლებელი. თავად გადახდა კი ტაილანდურ ბატში, QR კოდის საშუალებით განხორციელდება.
შესყიდვებზე დაწესებულია ლიმიტები: მსხვილი სავაჭრო ობიექტებისთვის ლიმიტი 500,000 ბატია (დაახლოებით 13,800 აშშ დოლარი), ხოლო მცირე მაღაზიებისთვის — 50,000 ბატი (დაახლოებით 1,380 აშშ დოლარი).
ეს ინიციატივა ტაილანდის მთავრობის მიერ ციფრული ეკონომიკის განვითარების სტრატეგიის ნაწილია, რომელიც მიზნად ისახავს ტურიზმის სექტორში ინოვაციების დანერგვას.
