საქართველო არის ძალიან მიმზიდველი ტურისტებისთვის, – აცხადებს თბილისისა და ბათუმის საერთაშორისო აეროპორტების ოპერატორი კომპანია TAV Georgia-ს გენერალური მენეჯერი თეა ზაქარაძე. ის ამით ხსნის საქართველოს საერთაშორისო აეროპორტებში მგზავრთნაკადის ზრდის ტემპს და მიიჩნევს, რომ უცხოელ ტურისტებში საქართველოს პოპულარულობას რამდენიმე ფაქტორი განაპირობებს.
მისი განმარტებით, COVID-პანდემიის შემდეგ ადამიანები უფრო მეტს მოგზაურობენ, რაც აეროპორტში ტრაფიკის ზრდის წინ პირობაა.
„ვფიქრობ, რომ COVID-პანდემიის შემდეგ ადამიანები უფრო ბევრს მოგზაურობენ. ეს ძალიან მნიშვნელოვანი ფაქტორია. ასევე საქართველო არის ძალიან მიმზიდველი ტურისტებისთვის. ვერ გამოვყოფ ვერც ერთ რეგიონს, რადგანაც ყველა რეგიონი წელს საკმაოდ დატვირთული იყო. საქართველოსადმი ინტერესს ალბათ განაპირობებს სტაბილურობა, სიმშვიდე, ავთენტური კულინარია, სამზარეულო, რაც იზიდავს საქართველოს შემთხვევაში ტურისტებს. ჩვენ ძალიან ბევრს ვმუშაობთ ევროპულ ავიაკომპანიებთან და არა მხოლოდ. თუმცა ევროპულს გამოვყოფ იმიტომ, რომ ბოლო პერიოდში საუბრობენ იმაზე, რომ აზიიდან მოიმატა რეისებმა. მხოლოდ აზიიდან არა, ჩვენთან ევროპიდანაც იზრდება მიმართულებები და სიხშირეები. წელს თბილისის საერთაშორისო აეროპორტში ოპერირება დაიწყო Austrian Airlines-მა, Transavia-მ, ხოლო მომავალ წელს დაზუსტებულად შემიძლია გითხრათ, რომ თბილისის მიმართულებით ფრენებს 3 ევროპული ავიაკომპანია დაიწყებს“, – ამბობს თეა ზაქარაძე.
