არალეგალური მიგრაციისა და ტერორისტული საფრთხეების გამო, საფრანგეთმა გადაწყვიტა აღადგინოს სასაზღვრო კონტროლი შენგენის ექვს მეზობელ ქვეყანასთან: ბელგიასთან, ესპანეთთან, ლუქსემბურგთან, შვეიცარიასთან, გერმანიასთან და იტალიასთან.
ქვეყანამ სასაზღვრო კონტროლი 1-ელ ნოემბერს დაიწყო და ძალაში მინიმუმ 30 აპრილამდე დარჩება.
საფრანგეთი მსგავს ზომებს 2015 წლიდან მიმართავს, როდესაც ქვეყანაში ტერორისტული თავდასხმები და მიგრანტების ნაკადი გაიზარდა. საფრანგეთის პრემიერ-მინისტრმა მიშელ ბარნიემ აღნიშნა, რომ იტალიასთან საზღვარზე კონტროლის მოდელმა უკვე დაამტკიცა თავისი ეფექტურობა და მთავრობა გეგმავს მის გაფართოებას ქვეყნის ყველა სახმელეთო საზღვრებზე. თავის განცხადებაში ბარნიემ ხაზგასმით აღნიშნა, რომ ასეთი ზომები საიმიგრაციო პოლიტიკის სფეროში საფრანგეთის მოქალაქეების მოლოდინებს აკმაყოფილებს.
გადაწყვეტილებამ საზოგადოებასა და ექსპერტებს შორის დისკუსია გამოიწვია.
მოგზაურობის ზოგიერთი ექსპერტი მიიჩნევს, რომ ეს ღონისძიება უარყოფითად იმოქმედებს ქვეყანაში არსებულ მდგომარეობაზე. მაგალითად, კონტროლის გაფართოებამ შეიძლება გაზარდოს საზღვარზე ლოდინის დრო და უარყოფითად იმოქმედოს ბიზნესსა და ვაჭრობაზე. გარდა ამისა, კონტროლი შეუქმნის დისკომფორტს საზღვარგარეთ მგზავრებს – ადამიანებს, რომლებიც ცხოვრობენ მეზობელ ქვეყანაში, მაგრამ მუშაობენ საფრანგეთში (ან პირიქით) და იძულებულნი არიან ხშირად გადაკვეთონ საზღვარი.
2 ნოემბერს, პან-ევროპულმა პოლიტიკურმა პარტიამ Volt Europa საფრანგეთსა და გერმანიას შორის სასაზღვრო კონტროლის აღდგენის წინააღმდეგ საპროტესტო აქცია გამართა.
