ავიაციის საერთაშორისო ორგანიზაციის (ICAO) 2025 წლის ანგარიშის მიხედვით, გასულ წელს მსოფლიოში კომერციულ რეისებზე 95 საავიაციო ინციდენტი დაფიქსირდა, მაშინ როცა 2023 წელს ეს მაჩვენებელი 66 იყო. ამ ინციდენტებიდან 10 ფატალური აღმოჩნდა, დაღუპულთა საერთო რაოდენობამ კი 296-ს მიაღწია, რაც საგრძნობლად აღემატება წინა წლის მონაცემებს (72).
ავარიების გლობალური მაჩვენებელიც გაიზარდა — 2.56 შემთხვევა ყოველ მილიონ რეისზე, 2023 წლის 1.87-თან შედარებით. თუმცა, ანალიტიკოსების თქმით, ეს მაჩვენებლები პანდემიამდელ პერიოდზე დაბალია, რადგან საავიაციო ინდუსტრია გადაზიდვების რეკორდულ მოცულობას უზრუნველყოფს — მსოფლიო მასშტაბით 37 მილიონზე მეტი რეისი შესრულდა.
ICAO-ს გენერალური მდივნის, ხუან კარლოს სალასარის თქმით, „ავიაცია ყველაზე უსაფრთხო ტრანსპორტის სახეობად რჩება და გრძელვადიანი ტენდენცია მუდმივ გაუმჯობესებას აჩვენებს“.
ორგანიზაციის მიერ ჩატარებულმა ანალიზმა გამოავლინა ოთხი რისკის კატეგორია, რომლებზეც 2024 წელს ფატალური შემთხვევების 25% და კატასტროფების 40% მოდის: ლაინერის მიწასთან შეჯახება, ინციდენტები ჰაერში, კონტროლის დაკარგვა ფრენისას და ასაფრენი ბილიკიდან გადასვლა. მგზავრების სერიოზული დაზიანებების სამი მეოთხედი ტურბულენტობასთან არის დაკავშირებული, რაც ამინდის ფაქტორების საშიშ ზემოქმედებაზე მიუთითებს.
გარდა ამისა, ანგარიშში საუბარია გლობალური სანავიგაციო სატელიტური სისტემის (GNSS) მიერ გამოწვეული რადიოსიხშირული ჩარევის მზარდ საფრთხეზე.
რაც შეეხება რეგიონულ სტატისტიკას, აზია-წყნარი ოკეანისა და ევროპა-ჩრდილოეთ ატლანტიკის რეგიონებში დაფიქსირდა თითოეულში სამი ფატალური კატასტროფა, ხოლო სამხრეთ ამერიკაში ერთი შემთხვევის შედეგად 62 ადამიანი დაიღუპა. დაღუპულთა ყველაზე მეტი რაოდენობა აზია-წყნარი ოკეანის რეგიონზე მოდის, მას მოსდევს სამხრეთ ამერიკა და ევროპა-ჩრდილოეთ ატლანტიკა.
