ლონდონიდან ესპანეთის ქალაქ ალიკანტესკენ მიმავალმა Ryanair-ის თვითმფრინავმა იძულებითი დაჯდომა საფრანგეთის ქალაქ ტულუზაში მას შემდეგ განახორციელა, რაც ბრიტანელი ტურისტების ჯგუფმა, რომელიც სასიძოს წინასაქორწინო წვეულებას აღნიშნავდა, ბორტზე არეულობა და დაპირისპირება მოაწყო. ინფორმაციას გაზეთი Metro ავრცელებს.
გავრცელებული ცნობით, ფრანგმა სამართალდამცავებმა წესრიგის დამრღვევები თვითმფრინავის სალონიდან გამოიყვანეს, რასაც მგზავრების აპლოდისმენტები მოჰყვა.
როგორც ცნობილია, მგზავრებიდან ორმა მამაკაცმა თვითმფრინავი ნებაყოფლობით დატოვა, თუმცა კიდევ ერთი, ბეისბოლის ქუდიანი, ტატუირებული მამაკაცი ხელისუფლებას დაუპირისპირდა და შეურაცხყოფებს ყვიროდა. სამართალდამცავებს მისი ბორტიდან ჩამოსაყვანად იძულებითი ძალის გამოყენება დასჭირდათ. ის იატაკზე დააწვინეს და შემდეგ გაიყვანეს.
ინციდენტის შემდეგ, სასიძოს წინასაქორწინო წვეულების ზოგიერთმა მონაწილემ გზა მარტო განაგრძო, რადგან მათი თანმხლები პირები საფრანგეთში დატოვეს.
ავიაკომპანია Ryanair-ში განაცხადეს, რომ ისინი იცავენ „მკაცრ ნულოვანი ტოლერანტობის პოლიტიკას მგზავრების არასათანადო ქცევის მიმართ“ და ხაზგასმით აღნიშნეს, რომ მომხდარის შემდგომ გამოძიებას ადგილობრივი პოლიცია აწარმოებს.
ეს არ არის პირველი მსგავსი ინციდენტი ბორტზე: 19 სექტემბერს, 60 წლის აგრესიულმა უცხოელმა, რომელიც არღვევდა საზოგადოებრივ წესრიგს, აიძულა სტამბოლი-ყაზანის რეისის თვითმფრინავი სოჭის აეროპორტში დაშვებულიყო.
