ევროპარლამენტის ახალი ინიციატივის ფარგლებში, ავიაკომპანიებს, მათ შორის Ryanair-სა და EasyJet-ს, ხელბარგის გადაზიდვის წესების გადახედვა მოუწევთ. მოსალოდნელი ცვლილებების თანახმად, მგზავრებისთვის უფასო ხელბარგის დასაშვები ზომა იზრდება, რაც მოგზაურობის პროცესს მნიშვნელოვნად გაამარტივებს. ამჟამინდელი რეგულაციებით, დაბალბიუჯეტიანი ავიახაზების მომხმარებლები ხშირად იძულებულნი არიან, მცირე ზომის ჩანთით დაკმაყოფილდნენ ან დამატებითი გადასახადი გადაიხადონ, თუმცა ახალი ნორმები მათ საშუალებას მისცემს, ბორტზე 100 სანტიმეტრამდე ზომის ხელბარგი და პირადი ჩანთა ყოველგვარი ზედმეტი ხარჯის გარეშე აიტანონ.
ევროპარლამენტის მიერ იანვარში მხარდაჭერილი წინადადების მიხედვით, მგზავრებს უფლება ექნებათ, სავარძლის ქვეშ მოსათავსებელი ჩანთის გარდა, თან იქონიონ მცირე ზომის ჩემოდანიც, რომლის წონა 7 კილოგრამს არ აღემატება. გარდა ბარგისა, საკანონმდებლო ინიციატივა ეხება თვითმფრინავში ადგილების განაწილების საკითხსაც. კერძოდ, 12 წლამდე ბავშვებს უნდა ჰქონდეთ შესაძლებლობა, უფასოდ დასხდნენ მშობლების ან თანმხლები პირების გვერდით, რაც ამჟამად ბევრ ავიაკომპანიაში დამატებით ფასიანი მომსახურებაა.
აღნიშნული ცვლილებები ძალაში მას შემდეგ შევა, რაც მათ ევროპული საბჭო დაამტკიცებს. რეგულაციები გავრცელდება ევროკავშირის ტერიტორიაზე მოქმედ ყველა იმ ავიაკომპანიაზე, რომელთა ბაზირების ადგილიც ევროპის თანამეგობრობის ქვეყნებია. სპეციალისტების შეფასებით, ეს ნაბიჯი ხელს შეუწყობს მგზავრების უფლებების დაცვას და ფრენის პროცესს უფრო კომფორტულსა და პროგნოზირებადს გახდის.
