ავიაკომპანია Ryanair-ის აღმასრულებელი დირექტორი, მაიკლ ო’ლირი, აცხადებს, რომ Boeing-ის პროგრესით აღფრთოვანებულია და იმედოვნებს, რომ ამერიკული მწარმოებელი თვითმფრინავების მიწოდების მოცულობას გაზრდის.
ო’ლირის თქმით, Boeing-მა მნიშვნელოვანი ნაბიჯები გადადგა ხარისხის კონტროლის გასაუმჯობესებლად მას შემდეგ, რაც Boeing 737 MAX 9-ის კარი ჩამოვარდა Alaska Airlines-ის რეისზე იანვარში.
„ისინი მკაცრად აკონტროლებენ ხარისხს. ჩვენ აღფრთოვანებულები ვართ მათი პროგრესით“, — განაცხადა ო’ლირიმ.
მისი თქმით, Boeing-ის ქარხანაში ვიზიტისას, დაინახა, რომ კომპანია პრობლემებს აქტიურად უმკლავდება. მიუხედავად ამისა, მიწოდების გრაფიკი კვლავ გამოწვევად რჩება.
Ryanair-ი, რომელიც Boeing 737-ის უმსხვილესი მომხმარებელია, მიმდინარე წელს Boeing-ისგან 57 თვითმფრინავს ელოდება. თუმცა, ო’ლირი იმედოვნებს, რომ Boeing-ი შეძლებს წარმოების თვიური ტემპი 38-დან 45 თვითმფრინავამდე გაზარდოს.
„თუ Boeing-ი თვეში 45 თვითმფრინავს გამოუშვებს, ჩვენ მათ შევიძენთ“, — აღნიშნა მან.
ამ ეტაპზე Boeing-ი თვეში მხოლოდ 31 თვითმფრინავს აწარმოებს, რის გამოც გლობალური მიწოდება შეფერხებულია. ო’ლირიმ ასევე აღნიშნა, რომ ბოლო დროს Airbus-მაც შეამცირა წარმოების გეგმები.
