დაბალბიუჯეტიანმა ავიაკომპანიამ Ryanair-მა განაცხადა, რომ გადადის ელექტრონულ ჩასხდომის ბარათებზე და აუქმებს მათი აეროპორტში ამობეჭდვის საფასურს.
12 ნოემბრიდან ავიაკომპანია აღარ დააკისრებს €20-იან მოსაკრებელს იმ მგზავრებს, რომლებმაც გაიარეს ონლაინ რეგისტრაცია, მაგრამ ვერ წარმოადგინეს ჩასხდომის ბარათის ამობეჭდილი ან ელექტრონული ვერსია აეროპორტში.
ცვლილება: აქამდე ასეთ მგზავრებს, მიუხედავად ონლაინ რეგისტრაციისა, ჯარიმის გადახდა უწევდათ. ახალი წესების თანახმად, მათ შეეძლებათ უფასოდ მიიღონ ამობეჭდილი ჩასხდომის ბარათი რეგისტრაციის დახლებზე ან გასასვლელთან.
უნდა აღინიშნოს, რომ აეროპორტში რეგისტრაციის საფასური კვლავ ძალაში რჩება მათთვის, ვინც საერთოდ არ გაიარა ონლაინ რეგისტრაცია. ავიაკომპანიის ვებგვერდის ინფორმაციით, ეს საფასური შეადგენს:
- €30 – ესპანეთიდან შესრულებულ რეისებზე.
- €40 – ავსტრიიდან შესრულებულ რეისებზე.
- €55 – სხვა ქვეყნებიდან შესრულებულ რეისებზე.
Ryanair-ის შეფასებით, ციფრულ ჩასხდომაზე გადასვლა საშუალებას მისცემს კომპანიას, წელიწადში 300 ტონამდე ქაღალდი დაზოგოს, გაზარდოს მობილური აპლიკაციის პოპულარობა და შეამციროს ოპერაციული ხარჯები.
