ისლანდიური დაბალბიუჯეტიანი ავიაკომპანია PLAY-ის წითელმა თვითმფრინავებმა შეიცვალეს ლივრეა და რეგისტრაცია, რათა უკრაინული ფესვების მქონე ავიაკომპანია SkyUp-ისთვისიფრინონ. ეს თანამშრომლობა უნიკალური გზაა ისლანდიური კომპანიისთვის ბიზნესის გადასარჩენად და, ამავდროულად, უკრაინელი ავიატორებისთვის დახმარების ხელის გასაწვდენად.
როდესაც PLAY-მ 2021 წელს პირველი რეისი განახორციელა, ინვესტორებს დიდი მოლოდინები ჰქონდათ, რომ ახალი ავიაკომპანია ევროპასა და ჩრდილოეთ ამერიკას ისლანდიის გავლით დააკავშირებდა. თუმცა, რამდენიმე წლის შემდეგ გაირკვა, რომ ამბიციური მოდელი კონკურენციას ვერ უძლებდა, რამაც მოსალოდნელი მოგების ნაცვლად, დანაკარგები მოიტანა. მარშრუტების ფართო ქსელმა და ტრანსატლანტიკურ მიმართულებებზე სასტიკმა კონკურენციამ კომპანია რადიკალური ნაბიჯების გადადგმისკენ აიძულა.
2025 წლის შემოდგომიდან PLAY სრულად უარს იტყვის ჩრდილოეთ ამერიკაში ფრენებზე და შეამცირებს რეისებს ჩრდილოეთ ევროპის ქალაქებში. ახლა აქცენტი კეთდება ისლანდიიდან სამხრეთ ევროპის ტურისტულ მიმართულებებზე პირდაპირ ფრენებზე, რაც ტრადიციულად უფრო მეტ შემოსავალს იძლევა.
ამ სტრატეგიის ყველაზე მოულოდნელი ელემენტი კი ფლოტის უმეტესი ნაწილის მიტოვებაა. ავიაკომპანიის ათი თვითმფრინავიდან ექვსი იჯარით გადაეცემა სხვა ევროპულ ავიაკომპანიებს. სწორედ აქ შემოდის სურათზე უკრაინა.
PLAY-ის ოთხი თვითმფრინავი უკვე გადაეცა ან მალე გადაეცემა უკრაინულ ავიაკომპანია SkyUp-ს. SkyUp 2022 წელს უკრაინაში რუსეთის შეჭრის შემდეგ იძულებული გახდა, მშობლიური ქვეყნის გარეთ დაეფუძნებინა ბაზა. ისლანდიელებისგან იჯარით აღებული თვითმფრინავები უკვე ასრულებენ რეგულარულ რეისებს კიშინიოვიდან, ასევე პოლონეთისა და რუმინეთის ქალაქებიდან.
SkyUp-ისთვის, რომელიც აქტიურად ავითარებს თავის ყოფნას ევროკავშირის ბაზარზე (ვინაიდან უკრაინის საჰაერო სივრცე დახურულია), PLAY-ის ახალი თვითმფრინავები პოზიციების გამყარების შესაძლებლობაა ევროპაში. თავის მხრივ, PLAY-სთვის ეს ხარჯების შემცირებისა და ფინანსური მდგომარეობის დასტაბილურების შანსია.
ამრიგად, ერთი ავიაკომპანია გაკოტრებისგან იხსნის თავს, მეორე კი – ომის მძიმე შედეგებისგან. ეს მაგალითია იმისა, თუ როგორ შეიძლება ეკონომიკა, ავიაცია და გეოპოლიტიკა ყველაზე მოულოდნელი გზით გადაიხლართოს.
PLAY-ის გადაწყვეტილება ფლოტის ნაწილის იჯარით გაცემის შესახებ, მიუხედავად იმისა, რომ ახალი მოდელი არ არის, განსაკუთრებულ მნიშვნელობას იძენს. ისლანდიელებმა აშკარად გაითვალისწინეს მათი წინამორბედის, 2019 წელს გაკოტრებული ისლანდიური დაბალბიუჯეტიანი ავიაკომპანია WOW Air-ის მწარე გამოცდილება, რომელმაც ვერ შეძლო სტრატეგიის დროული ადაპტირება.
ახლა PLAY-ის ფსონი უფრო მცირე მასშტაბზე, მეტ მოქნილობასა და უკრაინელ პარტნიორებზეა. თუ ეს სტრატეგია გაამართლებს, ის კარგი მაგალითი იქნება იმისა, თუ როგორ შეუძლიათ ორივე მხარეს გამარჯვება ტურბულენტურ პირობებში.
