მოგზაურობა ბევრ სასიამოვნო ემოციასთან ასოცირდება, თუმცა გეგმების ჩაშლის ერთ-ერთი ყველაზე გავრცელებული მიზეზი მოულოდნელი ავადმყოფობაა. წამყვანი სპეციალისტები გვიზიარებენ იმ კრიტიკულ რჩევებს, რომლებსაც ტურისტები ხშირად უგულებელყოფენ.
მთავარი იარაღი: ჰიგიენა და დისტანცია
ექიმი სურაჟ საგარი (Holy Name Medical Center) აღნიშნავს, რომ ხელების ხშირი დაბანა დაავადების პრევენციის საუკეთესო გზაა.
„ნუ დაივიწყებთ, რომ ბაქტერიები ყველგანაა. განსაკუთრებული სიფრთხილე გმართებთ აეროპორტებში, ავტობუსებსა და მატარებლებში, სადაც დახურული სივრცე და ხალხმრავლობა ვირუსების გავრცელების იდეალურ პირობებს ქმნის,“ — ამბობს ექიმი რობერტ ბირნბაუმი.
ექსპერტები გვირჩევენ ატარეთ სამედიცინო ნიღაბი – განსაკუთრებით ტრანსპორტში ან ხალხმრავალ ადგილებში.
გამოიყენეთ სადეზინფექციო საშუალებები – გაწმინდეთ თვითმფრინავის მაგიდა, სავარძლის სახელურები და უსაფრთხოების ღვედები.
ექიმების თქმით, ჯანმრთელობაზე ზრუნვა გამგზავრებამდე გაცილებით ადრე იწყება:
ვაქცინაცია: ჩაიტარეთ სეზონური გრიპისა და კოვიდის ბუსტერ-დოზები. თუ ეგზოტიკურ ქვეყანაში (მაგალითად, აფრიკაში) მიდიხართ, წინასწარ გაარკვიეთ, გჭირდებათ თუ არა სპეციალური აცრა (მაგ. ყვითელი ცხელების საწინააღმდეგო).
„24 საათის წესი“: თუ თავს შეუძლოდ გრძნობთ, გადადეთ მგზავრობა. წესის მიხედვით, არ უნდა გახვიდეთ გარეთ, სანამ სიცხის დამწევი საშუალებების გარეშე ტემპერატურა 24 საათის განმავლობაში არ დასტაბილურდება.
სამგზავრო აფთიაქი: თან იქონიეთ აუცილებელი მედიკამენტები და ნუ გამოტოვებთ მათ მიღებას რეჟიმის ცვლილების გამო.
იმუნიტეტის შესანარჩუნებლად მნიშვნელოვანია:
ჰიდრატაცია: სვით ბევრი წყალი და მოერიდეთ ალკოჰოლს.
კვება და ძილი: მიიღეთ ვიტამინებით მდიდარი საკვები და ეცადეთ, ორგანიზმს დასვენების საშუალება მისცეთ.
გონივრული რისკი: შვებულება ექსპერიმენტების დროა, თუმცა ექიმები გვირჩევენ, თავი ავარიდოთ გაუმართლებელ რისკებს, რაც ტრავმების ან მოწამვლის მიზეზი შეიძლება გახდეს.
