ბევრი მგზავრი ჩემოდნის სახელურზე ფერად ლენტს აბამს, რათა ის ბარგის გამოსატან ლენტზე ადვილად იცნოს. თუმცა, აეროპორტის ბარგის დამმუშავებლები და ექსპერტები გვაფრთხილებენ, რომ ამ უწყინარმა ჩვევამ შესაძლოა თქვენი ბარგი „გააქროს“.
თანამედროვე აეროპორტებში ბარგის დახარისხება ავტომატური სკანერების მეშვეობით ხდება. გრძელმა ან მოფრიალე ლენტმა შესაძლოა დაფაროს ჩემოდნის ბარკოდი (საიდენტიფიკაციო სტიკერი). თუ სკანერმა ბარკოდი ვერ წაიკითხა, ბარგი ავტომატურად გადადის „ხელით დახარისხების“ ზონაში, რაც ხშირად რეისზე მისი დაგვიანების ან სულაც დაკარგვის მიზეზი ხდება.
ლენტი შესაძლოა გაეჭედოს ბარგის გადამტან ლენტებს ან მექანიზმებს. ამან შეიძლება გამოიწვიოს არა მხოლოდ ლენტის მოგლეჯა, არამედ თავად ჩემოდნის სახელურის დაზიანება ან ბარგის სისტემიდან ამოვარდნა.
ზედმეტი აქსესუარები ზოგჯერ იპყრობს უსაფრთხოების სკანერების ყურადღებას და იწვევს ბარგის დამატებით შემოწმებას, რაც დროს აფერხებს.
თუ გსურთ, რომ თქვენი ჩემოდანი სხვებისგან გამოარჩიოთ, ექსპერტები გვირჩევენ:
- გამოიყენოთ ფერადი ჩემოდნის შალითები (Cover);
- დააკრათ დიდი სტიკერები პირდაპირ ჩემოდნის კორპუსზე;
- შეიძინოთ ორიგინალური ფერის ბარგი, რომელიც იშვიათია (მაგალითად, ნარინჯისფერი ან მწვანე).
ასევე, აუცილებლად მოაცილეთ ჩემოდანს ძველი ფრენების ბარკოდები და სტიკერები. მათი დატოვება სკანერებს აბნევს და ზრდის შანსს, რომ თქვენი ბარგი სრულიად სხვა მიმართულებით გაფრინდეს.
