ყაზახეთის ტრანსპორტის მინისტრმა, ნურლან საურანბაევმა, სენატში გამართულ საპარლამენტო მოსმენაზე განაცხადა, რომ 2040 წლისთვის ქვეყნის ავიაპარკი 144 ახალი თვითმფრინავით შეივსება. ტრანსპორტის სამინისტრო, სამოქალაქო ავიაციის საერთაშორისო ორგანიზაციასთან (ICAO) ერთად, ამჟამად მუშაობს ავიაციის განვითარების გრძელვადიან მასტერპლანზე 2050 წლამდე, რომლის დამტკიცებაც 2026 წლის ბოლომდე იგეგმება.
მინისტრმა ხაზი გაუსვა ყაზახეთის გავლით ტრანზიტული საჰაერო გადაზიდვების მდგრად ზრდას – ბოლო ხუთი წლის განმავლობაში ეს მაჩვენებელი ოთხჯერ გაიზარდა. დღეისათვის აერონავიგაციის მომსახურებიდან მიღებული შემოსავლების ძირითადი ნაწილი სწორედ ტრანზიტულ ნაკადებზე მოდის. ინფრასტრუქტურის მოდერნიზაციის ფარგლებში, 2025 წელს ამერიკულ კომპანია Leidos-თან გაფორმდა კონტრაქტი საჰაერო მოძრაობის მართვის სისტემების განახლების შესახებ, რაც უახლოეს ხუთ წელში საჰაერო დერეფნების გამოყენების ეფექტიანობას მნიშვნელოვნად გაზრდის.
მიუხედავად ამბიციური გეგმებისა, საურანბაევმა აღნიშნა, რომ გლობალურ ბაზარზე საჰაერო ხომალდების დეფიციტია. წამყვანი მწარმოებლებისგან ახალი თვითმფრინავების მოწოდების ვადები ხშირად 8-10 წელს აღწევს, რაც გავლენას ახდენს ავიაპარკების განახლების ტემპზე. მიუხედავად ამ გამოწვევებისა, ყაზახეთი აგრძელებს ფლოტის მოდერნიზაციას და 2026 წლის ბოლომდე კიდევ ექვსი ახალი ხომალდის მიღებას ელოდება.
