Qatar Airways ემზადება ბიზნეს კლასის ცნობილი პროდუქტის, Qsuite-ის ფუნდამენტურად განახლებული ვერსიის, Qsuite Next Generation-ის წარსადგენად. მიუხედავად იმისა, რომ თავდაპირველად მისი დებიუტი 2025 წელს იგეგმებოდა, Boeing 777-9-ის პროგრამის შეფერხების გამო, ახალი სუიტის მგზავრებისთვის პირველად გაშვება უფრო რეალურად 2026 წლისთვისაა მოსალოდნელი.
ახალი სუიტი შეინარჩუნებს Qsuite-ის ძირითად უპირატესობებს (კონფიდენციალურობა, მოქნილობა და მაღალი დონის მომსახურება), მაგრამ გაზრდილ აქცენტს გააკეთებს სივრცეზე, სმარტ ტექნოლოგიებსა და სოციალურ კონფიგურაციებზე, რაც განსაკუთრებით გათვლილია ოჯახებზე, მცირე ჯგუფებსა და ერთად მოგზაურ ბიზნესმენებზე.
ახალი თაობის Qsuite-ში აქცენტი გაკეთდა სივრცის უფრო კრეატიულად გამოყენებასა და მგზავრისთვის მეტი ციფრული კონტროლის მინიჭებაზე:
ოთხადგილიანი ზონა, რომელიც ახლა სრულად იხსნება და მობილური 4K OLED Panasonic Astrova გასართობი ეკრანებით არის აღჭურვილი. ეკრანები გვერდზე იწევა, რაც ოთხი მგზავრისთვის ყველაზე დიდ სოციალურ და სამუშაო სივრცესქმნის ცაში.
გაფართოებული საერთო სივრცის კონცეფცია, რომელიც ახლა ფანჯრის გასწვრივ მდებარე სუიტებსაც ეხება. ეს წყვილებს საშუალებას აძლევს, ისიამოვნონ ხედით და ივახშმონ პირისპირ (ე.წ. “companion suite” რეჟიმი).
დამატებულია უფრო მაღალი, ციფრულად კონტროლირებადი გამყოფები, რაც მაქსიმალურ განმარტოებას უზრუნველყოფს.
გაზრდილი ზომის მწოლიარე და ორადგილიანი საწოლები (Double Beds) სპეციალური “Make My Bed” ფუნქციით. 4K OLED ეკრანები Bluetooth აუდიო სტრიმინგით.
განახლებული სენსორული პანელები (Touchscreen Passenger Control Units) ambient განათების, კონფიდენციალურობისა და სხვა ფუნქციების სამართავად.
Qsuite Next Generation-ის დებიუტი დაგეგმილია Qatar Airways-ის ახალ Boeing 777-9 ფლოტზე, რომელთაგან ავიაკომპანიას 60 ერთეული აქვს შეკვეთილი. მიუხედავად იმისა, რომ Boeing-ის მიწოდების გრაფიკი 2027 წლისკენ გადაიწია, ავიაკომპანია იმედოვნებს, რომ ახალი ბიზნეს კლასი 2026 წლის ბოლოს ან 2027 წლის დასაწყისში მაინც გამოჩნდება ექსპლუატაციაში.
Qatar Airways თავის პრემიუმ კლასის კაბინებს, რომლის ცენტრალური ნაწილი Qsuite-ია, იყენებს, როგორც მთავარ მოგების წყაროს გრძელვადიან მარშრუტებზე. ავიაკომპანიის განცხადებით, ახალი სუიტი დაეხმარება მას, შეინარჩუნოს ლიდერობა გრძელვადიანი პრემიუმ ბაზრის სეგმენტში.
