ისრაელის კომპანია Israel Aerospace Industries (IAI) აცხადებს, რომ მსოფლიოში პირველად დაასრულა Boeing 777-300ERSF ტიპის თვითმფრინავის სამგზავროდან სატვირთოდ კონვერსია.
კომპანიამ ამერიკის (FAA) და ისრაელის (CAAI) საავიაციო უწყებებისგან ოფიციალური ლიცენზიები უკვე მიიღო. განახლებულ თვითმფრინავს 100 ტონამდე ტვირთის გადატანა შეუძლია, გამოირჩევა საწვავის მაღალი ეფექტურობით და განკუთვნილია შორ მანძილზე ფრენებისთვის. ეს მახასიათებლები მას სატვირთო გადაზიდვების ბაზრის პოტენციურ ლიდერად აქცევს.
ამ მოდელის პირველი დამკვეთები და ოპერატორები კომპანიები AerCap და Kalitta იქნებიან.
IAI-ის მიღწევა კიდევ უფრო აძლიერებს ისრაელის პოზიციას გლობალურ საავიაციო ინდუსტრიაში. ეს წარმატება ქვეყანას ახალ ეკონომიკურ და სტრატეგიულ შესაძლებლობებს უხსნის საერთაშორისო გადაზიდვების სწრაფად მზარდ სექტორში.
