ბრიტანული ავიაკომპანია Virgin Atlantic-ის პილოტი მექსიკის ქალაქ კანკუნის სასტუმროში მთვრალი და შიშველი იპოვეს, რის გამოც ლონდონის მიმართულებით რეისი 26 საათით გადაიდო.
როგორც უცხოური მედია იტყობინება, პილოტი, რომელიც ლონდონის ჰითროუს აეროპორტში რეისი უნდა შეესრულებინა, თავისი ცვლის დაწყებამდე რამდენიმე საათით ადრე შეამჩნიეს არაფხიზელ მდგომარეობაში. მისი ქცევა სასტუმროს თანამშრომლებმა აღწერეს, როგორც „შეუსაბამო“. ინციდენტის შემდეგ, პილოტი საავადმყოფოში გადაიყვანეს შესაბამისი შემოწმებისთვის.
მომხდარის გამო, ასობით მგზავრი იძულებული გახდა კანკუნში დამატებით 26 საათი გაეტარებინა. ავიაკომპანიამ ოფიციალური განცხადება გაავრცელა, რომელშიც ბოდიში მოიხადა მგზავრების წინაშე და დაადასტურა, რომ პილოტი თანამდებობიდან გაათავისუფლა.
კომპანიის განცხადებით, პილოტის ასეთი ქცევა მიუღებელია და ეწინააღმდეგება მათ უსაფრთხოების მკაცრ სტანდარტებს. ინციდენტში მონაწილე პილოტი სამსახურიდან დაუყოვნებლივ გაათავისუფლეს.
