ევროკავშირის იმ 5 ქვეყნის მიმართულებით, რომლებთანაც საქართველომ საზღვარი უპირობოდ გახსნა, საავიაციო მიმოსვლის და რეგულარული რეისების აღდგენის მიზნით, მოლაპარაკებები მიმდინარეობს საერთაშორისო ავიაკომპანიებთან.

მთავრობის ადმინისტრაციის ცნობით, ავიაკომპანია Lufthansa-სთან უკვე მიღწეულია შეთანხმება, კომპანია მიუნხენის მიმართულებით აგვისტოდან კვირაში 2 რეისს შეასრულებს.

მთავრობა მუშაობს ასევე ფრენების განახლებაზე AirBaltic-სა და AirFrance-თან.

შეგახსნებთ, რომ საქართველომ საზღვარი გერმანიას, საფრანგეთს, ლატვიას, ლიტუვას და ესტონეთს გაუხსნა.

ამავდროულად საზღვარგარეთ მყოფი საქართველოს მოქალაქეების სამშობლოში ორგანიზებულად დასაბრუნებლად, ივლისის განმავლობაში, ავიაკომპანიები – Wizzair-ი და Myway Airlines-ი შეასრულებენ შემდეგ ავიარეისებს:

13 ივლისი – ვარშავა,

15 ივლისი – ბარსელონა,

17 ივლისი – რომი,

22 ივლისი – პარიზი,

28 ივლისი – ათენი.

რეისებზე ბილეთის ფასი საქართველოს მოქალაქეებისთვის არ იქნება 200 ევროზე მეტი.

კომერციულ ჩარტერულ რეისებს ახორციელებს ქართული ავიახაზები (აირზენა) შემდეგ დედაქალაქებში: ვენაში, ამსტერდამსა და თელავივში.

უახლოეს დღეებში, ერთჯერად შესრულდება კატარის ავიახაზების კომერციული ჩარტერული რეისი, დედაქალაქ დოჰადან, საიდანაც სამშობლოში საქართველოს 105 მოქალაქე დაბრუნდება.