ლატვიის ტრანსპორტის სამინისტრო ესტონეთსა და ლიეტუვას ეროვნულ ავიაგადამზიდ airBaltic-ში თანამფლობელობაზე ოფიციალურ შეთავაზებას გაუგზავნის.
ამგვარი გადაწყვეტილება ლატვიის მთავრობამ დახურულ სხდომაზე მიიღო.
შეთავაზება გაკეთდება კომპანიის აქციების საწყის საჯარო განთავსებამდე. ინიციატივის მიზანია — გააძლიეროს airBaltic-ის პოზიციები ბაზარზე ბალტიისპირეთის სხვა სახელმწიფოებისა და გერმანული ავიაკომპანიის Lufthansa-ს პარტნიორობით.
ლატვიის ხელისუფლების აზრით, რადგან ესტონეთი და ლიეტუვაც იღებენ მოგებას airBaltic-ის ფრენებიდან, აზრი აქვს, მათაც შესთავაზონ მონაწილეობა კომპანიის განვითარებაში.
გარდა ამისა, ავიაკომპანია airBaltic-მა გამოაცხადა პირდაპირი რეისების დაწყება ტალინსა და პორტუგალიის კუნძულ მადეირას შორის. ახალი მარშრუტით ფრენები შესრულდება ყოველ კვირას, 2025 წლის 26 ოქტომბრიდან 2026 წლის 22 მარტის ჩათვლით. ბილეთების შეძენა უკვე შესაძლებელია კომპანიის ვებგვერდზე.
