ავიაკომპანია KLM-მა ნიდერლანდების ტერიტორიაზე Airbus A350-ის პირველი მოწინავე ფრენის სიმულატორი დაამონტაჟა, რითაც 2026 წელს ამ ტიპის თვითმფრინავის ექსპლუატაციაში ჩაშვებისთვის ემზადება.
3 ოქტომბერს ავიაკომპანიამ დაადასტურა, რომ სიმულატორი უკვე მზადაა გამოსაყენებლად და A350-ის პირველი პილოტები ტრენინგებს მალე დაიწყებენ.
სიმულატორი კანადაში, მონრეალში, კომპანია CAE-ს მიერ აშენდა. იქ მისი კაბინა და სისტემები საფუძვლიანად შემოწმდა, რის შემდეგაც ნაწილებად გაიგზავნა ევროპაში.
KLM-ის ცნობით, სიმულატორის დამონტაჟება ლოგისტიკურად რთული აღმოჩნდა მისი დიდი ზომის გამო: იგი ვერ გაეტეოდა მთავარ ჭიშკარში, რის გამოც მისი გადატანა ღობის თავზე ამწის საშუალებით გახდა საჭირო.
სიმულატორი KLM-ის ბაზაზე, სხიპჰოლ-ისტში (Schiphol-East), ამსტერდამის სხიპჰოლის აეროპორტიდან (AMS) მცირე მანძილზეა განთავსებული.
KLM-ის გადაწყვეტილება ემყარება 2023 წელს Air France-KLM ჯგუფის მიერ გაფორმებულ შეკვეთას 50 ერთეულ Airbus A350-ზე (როგორც A350-900, ისე A350-1000 მოდელები), დამატებით 40 ერთეულზე ოფციით.
როგორც Air France-KLM-ის აღმასრულებელმა დირექტორმა, ბენჯამინ სმიტმა, მაშინ განაცხადა, A350 არის უახლესი თაობის თვითმფრინავი, რომელიც 2019 წელს Air France-ში ექსპლუატაციაში შესვლის დღიდან გახდა „მგზავრებისა და ეკიპაჟის ფავორიტი“.
