ბერლინის ტურისტული გამოფენის დაწყებამდე რამდენიმე დღით ადრე საქართველოს სტენდის ბოლო მოსამზადებელ სამუშაოებს საქართველოს ეკონომიკისა და მდგრადი განვითარების მინისტრის მოადგილე მარიამ ქვრივიშვილთან და საქართველოს ტურიზმის ეროვნული ადმინისტრაციის ხელმძღვანელ მაია ომიაძესთან ერთად ადგილზე გაეცნო ITB ბერლინის დირექტორი დებორა როთი.
საქართველოს სტენდთან გამოფენის დირექტორმა ITB 2023-ზე, საქართველოს როგორც მასპინძელი ქვეყნის სტატუსის მნიშვნელობაზე ისაუბრა.
„რამდენიმე დღეში ITB ბერლინის ტურისტული გამოფენის კარი გაიხსნება. ჩვენ მოხარულები ვართ, რომ წელს საქართველოსთან ერთად ვატარებთ ამ ღონისძიებას და საქართველო მასპინძელი ქვეყნის სტატუსით არის წარმოდგენილი. მასპინძელ ქვეყანასთან პარტნიორობა თანამშრომლობის ფართო სპექტრს მოიცავს. ჩვენ საქართველოსთან ერთი წელია მჭიდროდ ვმუშაობთ, ერთად დავგეგმეთ ITB 2023-ის აქტივობები. გამოფენაზე საქართველოს სტენდი 700 კვ. მ. ფართობზე მეტ ტერიტორიას დაიკავებს და მოუთმენლად ველი როდის მიიღებს ის საბოლოო სახეს. ეს სპეციალური და შესანიშნავი სტენდი საქართველოს მრავალფეროვან კულტურას და გამორჩეულ ისტორიას ასახავს”,-აცხადებს ITB ბერლინის გამოფენის დირექტორი დებორა როთი.
გამოფენაზე საქართველოს მთავარი კონცეფციაა „უსაზღვრო სტუმარმასპინძლობა”.
ITB Berlin 1966 წლიდან იმართება. 2019 წელს, მსოფლიო პანდემიამდე ITB Berlin-მა მსოფლიოს 181 ქვეყნიდან გამოფენის 10 ათას მონაწილეს უმასპინძლა. გამოფენას 160 ათასი სტუმარი ჰყავდა და მედიის 5000-მდე წარმომადგენელი აშუქებდა.
