ავიაკომპანია Flydubai-მ რუმინულ ეროვნულ გადამზიდავ TAROM-თან ინტერლაინ შეთანხმება გააფორმა, რის შედეგადაც მგზავრებს ევროპის 15 ახალი მიმართულება გაუხსნებათ. ფრენები ბუქარესტის საერთაშორისო აეროპორტის (OTP) გავლით განხორციელდება.
ახალ მიმართულებებს შორის არის: ათენი, ამსტერდამი, ბრიუსელი, კლუჟ-ნაპოკა, ფრანკფურტი, მადრიდი და პარიზი. Flydubai-ის მგზავრებისთვის ხელმისაწვდომი იქნება არა მხოლოდ გამარტივებული მარშრუტები, არამედ ბილეთების ერთიანი დაჯავშნისა და ბარგის რეგისტრაციის ფუნქციები.
ამჟამად, Flydubai დუბაიდან ბუქარესტის მიმართულებით ორ ყოველდღიურ რეისს ასრულებს. 2025 წლის 19 სექტემბრიდან ავიაკომპანია მეორე რუმინულ მარშრუტს, იასის მიმართულებით, გახსნის. გადამზიდავის საერთო ქსელი 57 ქვეყანაში 135-ზე მეტ მიმართულებას მოიცავს.
TAROM-ის წარმომადგენლების განცხადებით, Flydubai-სთან თანამშრომლობა გააფართოებს უსაფრთხო და კომფორტული ფრენების შესაძლებლობებს და ხელს შეუწყობს რეგიონებს შორის ტურიზმისა და ბიზნესის განვითარებას.
