ბრიუსელში გამართულ ავიაკომპანიების გაერთიანების (A4E) შეხვედრაზე ევროპის უმსხვილესმა ავიაგადამყვანებმა მგზავრები ბილეთების ფასების მოსალოდნელი მატების შესახებ გააფრთხილეს. მთავარ მიზეზად ახლო აღმოსავლეთში მიმდინარე საომარი მოქმედებების გამო საავიაციო საწვავზე ფასების ნახტომისებური ზრდა სახელდება. IATA-ს მონაცემებით, ნავთის ღირებულება გასულ წელთან შედარებით უკვე 94%-ით არის გაზრდილი.
Lufthansa-ს, Air France-KLM-ისა და EasyJet-ის ხელმძღვანელები აცხადებენ, რომ მიუხედავად მცდელობისა, შეინარჩუნონ სტაბილური ფასები, დამატებითი ხარჯების ნაწილობრივ ასახვა სამგზავრო ტარიფებზე მაინც მოუწევთ. EasyJet-ის გენერალური დირექტორი კენტონ ჯარვისი და Ryanair-ის ხელმძღვანელი მაიკლ ო’ლირი მომხმარებლებს ურჩევენ, დაჯავშნონ ბილეთები რაც შეიძლება ადრე, რათა თავიდან აიცილონ მომავალი თვეების გაძვირებული ტარიფები.
საინტერესოა, რომ შექმნილმა კრიზისმა ევროპული ავიაკომპანიებისთვის გარკვეული სტრატეგიული უპირატესობაც წარმოშვა. მას შემდეგ, რაც სპარსეთის ყურის ქვეყნების საავიაციო ჰაბები (დუბაი, დოჰა) შეფერხებებით მუშაობენ, ევროპული კომპანიები აზიის მიმართულებით რეისების რაოდენობას ზრდიან:
Lufthansa-მ აზიის მიმართულებით 40 ახალი რეისი დაამატა.
Air France-KLM ზრდის გამტარუნარიანობას აზიასა და აფრიკაში მაღალი მოთხოვნის გამო.
British Airways-მა დააანონსა პირდაპირი რეისები მელბურნში (კუალა-ლუმპურის გავლით) და ზრდის ფრენების სიხშირეს კარიბის ზღვის აუზის ქვეყნებისკენ.
Oxford Economics-ის პროგნოზით, ახლო აღმოსავლეთიდან ევროპაში ტურიზმი შესაძლოა დაზარალდეს, თუმცა ისეთი მიმართულებები, როგორიცაა ესპანეთი, პორტუგალია და საბერძნეთი, შესაძლოა სპარსეთის ყურის ქვეყნების ალტერნატივად იქცნენ. პარალელურად, ევროპული ავიაკომპანიები ლიდერებს ეკოლოგიური გადასახადების შემცირებისკენ მოუწოდებენ, რათა შეინარჩუნონ კონკურენტუნარიანობა იმ გადამყვანებთან, რომლებიც მსგავსი რეგულაციებით არ იზღუდებიან.
