ავიაკომპანია Etihad Airways-მა აფრიკის კონტინენტზე საკუთარი წარმომადგენლობის გაფართოების შესახებ განაცხადა. გლობალური ზრდის სტრატეგიის ფარგლებში, აბუ-დაბის ბაზაზე მოქმედი ავიაგადამზიდი ხუთ ქვეყანაში — კონგოს დემოკრატიულ რესპუბლიკაში, ერიტრეაში, განაში, ნიგერიასა და ზიმბაბვეში — ექვს ახალ მიმართულებას ამატებს. აღნიშნული გადაწყვეტილება მიზნად ისახავს მაღალი პოტენციალის მქონე ბაზრების ათვისებას და ვაჭრობის, ტვირთბრუნვისა და მობილობის ხელშეწყობას.
ახალი მარშრუტების დამატება პირდაპირ კავშირშია Etihad-ის ბოლოდროინდელ გაფართოებასთან ჩინეთის ბაზარზე. აბუ-დაბი ყალიბდება საკვანძო კარიბჭედ, რომელიც აფრიკას, ინდოეთსა და აზიას აკავშირებს, რაც უზრუნველყოფს საქონლისა და ინვესტიციების უფრო ეფექტურ გადაადგილებას მსოფლიოს ყველაზე სწრაფად მზარდ რეგიონებს შორის. ეს ნაბიჯი ასევე თანხვედრაშია არაბთა გაერთიანებული საამიროებისა და აფრიკის ქვეყნების მზარდ ეკონომიკურ ურთიერთობებთან ისეთ სექტორებში, როგორიცაა ენერგეტიკა, ინფრასტრუქტურა და ლოგისტიკა.
Etihad Airways-ის აღმასრულებელი დირექტორის, ანტონოალდო ნევესის განცხადებით, აფრიკის ბაზარი ავიაკომპანიის ქსელის გაფართოების ბუნებრივი და აუცილებელი ეტაპია. მისი თქმით, ამ რეგიონში მოთხოვნა საჰაერო გადაყვანებზე აჭარბებს არსებულ მიწოდებას, განსაკუთრებით სატვირთო სექტორში. ახალი დერეფანი მგზავრებისთვის მოგზაურობას ამარტივებს, ხოლო ბიზნესისთვის ქმნის საიმედო კავშირს ჩინეთთან და აზიის სხვა ქვეყნებთან, სადაც ვაჭრობის ტემპი დინამიკურად იზრდება.
განრიგის მიხედვით, პირველი რეისი აბუ-დაბიდან ასმარას (ერიტრეა) მიმართულებით 2026 წლის 7 ნოემბრიდან შესრულდება. 2027 წლის მარტიდან კი ფრენები დაიწყება აკრას (განა), კინშასას (კონგოს დემოკრატიული რესპუბლიკა), ლაგოსის (ნიგერია), ჰარარესა (ზიმბაბვე) და ლუბუმბაშის (კონგოს დემოკრატიული რესპუბლიკა) მიმართულებით. პროექტში მნიშვნელოვან როლს შეასრულებს Etihad Cargo-ც, რომელიც თითოეული ბაზრის სპეციფიკაზე მორგებულ სატვირთო მომსახურებას უზრუნველყოფს.
