Emirates-მა დუბაის საერთაშორისო აეროპორტის (DXB) მესამე ტერმინალში ახალი, ექსკლუზიური რეგისტრაციის ზონა – Emirates First გახსნა. ეს სივრცე სპეციალურად First კლასის მგზავრებისა და Skywards Platinum-ის წევრებისთვისაა განკუთვნილი, რათა მათ მოგზაურობა განსაკუთრებული კომფორტით დაიწყონ.
ახალ ზონაში სტუმრებს ემირატების ერთგული მასპინძლები ხვდებიან. ინტერიერი თბილ, ნეიტრალურ ტონებშია გაფორმებული, ტყავის სავარძლებით, მარმარილოს იატაკითა და ცოცხალი მცენარეებით, რაც დამამშვიდებელ ატმოსფეროს ქმნის და აეროპორტის სტრესულ გარემოს აშორებს. ავიაკომპანიის განცხადებით, თვალშისაცემი, განათებული ხე პატივს მიაგებს არაბთა გაერთიანებული საამიროების ეროვნულ სიმბოლოს, ხოლო მკრთალი განათება და ციფრული ეკრანების არარსებობა კიდევ უფრო უწყობს ხელს სიმშვიდის განცდას.
რეგისტრაციის შემდეგ, მგზავრები დაჩქარებულ უსაფრთხოებისა და იმიგრაციის კონტროლს გადიან, რის შემდეგაც მათ მესამე ტერმინალში მდებარე Emirates First კლასის სამი ლაუნჯიდან ერთ-ერთი ელოდება. აქ სტუმრებს შესთავაზებენ შეფ-მზარეულის მიერ შექმნილ დახვეწილ კერძებს, ელიტურ ღვინოებს, უფასო სპა პროცედურებსა და კონსიერჟის მომსახურებას.
„Emirates First გთავაზობთ უნიკალურ, კერძო გარემოს, რომელიც რეგისტრაციის გამოცდილებას ახალ დონეზე აჰყავს“, — განაცხადა ავიაკომპანიის ვიცე-პრეზიდენტმა და მთავარმა ოპერაციულმა დირექტორმა, ადელ ალ რედჰამ.
Emirates ამჟამად საერთაშორისო რეისების უმსხვილესი ოპერატორია, რომელიც ყოველკვირეულად 26,800-ზე მეტ მგზავრს ემსახურება. საერთო ჯამში, ავიაკომპანიის პირველი კლასის მგზავრებს მსოფლიოს მასშტაბით 43 ლაუნჯზე წვდომა და უმეტეს მარშრუტზე უფასო მძღოლის მომსახურება აქვთ, რაც უზრუნველყოფს კომფორტულ მგზავრობას „კარიდან კარამდე“.
