დელის ინდირა განდის სახელობის საერთაშორისო აეროპორტში (IGI) ხუთთვიანი რეკონსტრუქციის შემდეგ, ტერმინალი 2-ის გახსნა 2025 წლის 26 ოქტომბერს იგეგმება. ობიექტის ექსპლუატაციაში შესვლა საჰაერო ნავსადგურის გამტარუნარიანობას მნიშვნელოვნად გაზრდის.
განახლებულ T2 ტერმინალში გადაინაცვლებს Air India-სა და IndiGo-ს ყოველდღიური 120 შიდა რეისი. დელის აეროპორტი ქვეყანაში ყველაზე დატვირთულად და მსოფლიოში ერთ-ერთ ყველაზე სწრაფად მზარდად რჩება. ამჟამად აეროპორტში ფუნქციონირებს ტერმინალები 1 და 3, ხოლო T2-ის გახსნა ხელს შეუწყობს მათი დატვირთვის შემცირებას.
განახლებულ შენობაში დაინერგება არაერთი ინოვაცია მგზავრების გამოცდილების გასაუმჯობესებლად:
ავტონომიური ტელეტრაპები: დამონტაჟდება ინდოეთში პირველი ექვსი ავტონომიური ტელეტრაპი, რომლებიც აღჭურვილი იქნება ეტლებისთვის განკუთვნილი პანდუსებით.
თვითმომსახურების ბარგის ჩაბარების დახლები (SBD): მგზავრებს შეეძლებათ დამოუკიდებლად დაასკანერონ ჩასხდომის ბარათები, მონიშნონ ბარგი და ჩააბარონ ის, რაც მნიშვნელოვნად შეამცირებს ფრენამდე საჭირო პროცედურების დროს.
გაუმჯობესებული ნავიგაცია: ფრენის შესახებ ინფორმაციის ჩვენების სისტემა (FIDS) ექნება უფრო მაღალი გარჩევადობა, ხოლო მკაფიო მაჩვენებლები გააუმჯობესებს ობიექტის ნავიგაციას.
თანამედროვე დიზაინი: ტერმინალს დაამშვენებს თანამედროვე ჭერი, ინოვაციური ფანჯრის დიზაინი და მოწინავე იატაკის საფარი, რაც შენობას უფრო ნათელსა და ფართო გახდის.
მოდერნიზაცია ასევე მოიცავდა გათბობის, ვენტილაციისა და კონდიცირების ახალი სისტემების დამონტაჟებას, ხანძარსაწინააღმდეგო უსაფრთხოების სისტემის გაუმჯობესებასა და უფრო მძლავრი ელექტრო ინფრასტრუქტურის შექმნას.
რეკონსტრუქცია შეეხო ასაფრენ-დასაფრენ ზოლებსა და პერონებსაც, რომლებიც ოთხ ათწლეულზე მეტი ხნის განმავლობაში ემსახურებოდნენ აეროპორტს.
