ავიაკომპანია British Airways-მა 2026 წლის ზამთრის სეზონისთვის შორ მაგისტრალური ფრენების ქსელის 9%-იანი ზრდა დააანონსა. ოფიციალური პრესრელიზის თანახმად, ავიაკომპანია ორ ახალ მიმართულებას — მელბურნსა (ავსტრალია) და კოლომბოს (შრი-ლანკა) ამატებს, პარალელურად კი ზრდის ფრენების სიხშირეს პოპულარულ დასასვენებელ მარშრუტებზე. ეს ცვლილებები პასუხია გლობალური მოგზაურობის შეცვლილ მოთხოვნებზე, რაც ნაწილობრივ ახლო აღმოსავლეთში მიმდინარე კონფლიქტითა და მომხმარებლების მხრიდან ალტერნატიული, უსაფრთხო მიმართულებების ძიებით არის განპირობებული.
ახალი მარშრუტებიდან კოლომბოს მიმართულებით სეზონური ფრენები ლონდონის გატვიკის აეროპორტიდან 2026 წლის 23 ოქტომბრიდან დაიწყება და კვირაში სამჯერ შესრულდება. რაც შეეხება მელბურნს, ყოველდღიური რეისები ჰითროუს აეროპორტიდან, კუალა-ლუმპურის გავლით, 2027 წლის 9 იანვრიდან ჩაეშვება. აღსანიშნავია, რომ მელბურნის რეისის დაწყება სტრატეგიულად ემთხვევა ავსტრალიის ღია პირველობასა და ფორმულა 1-ის გრან-პრის, რაც ამ მიმართულებაზე მაღალ მოთხოვნას უზრუნველყოფს.
ქსელის გაფართოება ასევე მოიცავს ფრენების სიხშირის ზრდას რამდენიმე საკვანძო მიმართულებით. მაგალითად, კეიპტაუნის მიმართულებით დეკემბრიდან მესამე ყოველდღიური რეისი დაემატება, ხოლო ტოკიოს (ჰანედა) მიმართულებით ფრენები გაორმაგდება. გაძლიერდება მომსახურება კარიბის ზღვის აუზის ქვეყნებშიც: ბარბადოსის მიმართულებით გატვიკიდან ყოველდღიური რეისი დაიწყება, გაიზრდება ფრენების რაოდენობა კოსტა-რიკასა და იამაიკაშიც. ავიაკომპანიის დაკვირვებით, მოგზაურთა ინტერესი ისეთი კუნძულების მიმართ, როგორიცაა ანტიგუა და გრან-კანარია, 50-60%-ით არის გაზრდილი.
ახლო აღმოსავლეთში შექმნილი ვითარების გამო, British Airways-მა მოკლევადიანი კორექტირებაც მოახდინა: გააუქმა ფრენები ამანის, ბაჰრეინის, დუბაისა და თელ-ავივის მიმართულებით 31 მაისამდე, ხოლო დოჰას მიმართულებით — 30 აპრილამდე. გამოთავისუფლებული რესურსი ავიაკომპანიამ აზიის მიმართულებით გადაანაწილა, კერძოდ, დაამატა შვიდი საპასუხო რეისი ბანგკოკსა და სინგაპურში, რაც მგზავრებს დამატებით 3 300-ზე მეტ ადგილს სთავაზობს. კომპანიის სტრატეგიული დაგეგმარების ხელმძღვანელის, ნილ ჩერნოფის განცხადებით, ეს ცვლილებები წარმოადგენს მნიშვნელოვან ინვესტიციას დასვენებაზე ორიენტირებული ქსელის განვითარებაში.
