British Airways-ი აანონსებს მნიშვნელოვან ინოვაციას მგზავრების მომსახურებაში – 2026 წლიდან ავიაკომპანია ყველა რეისზე, განურჩევლად კაბინის კლასისა, მგზავრებს Starlink-ის მაღალსიჩქარიან და უფასო ინტერნეტს შესთავაზებს.
ეს სერვისი ხელმისაწვდომი იქნება როგორც ხანგრძლივი, ისე მოკლე მანძილის ყველა British Airways-ის რეისზე (მათ შორის Euroflyer-ის ოპერირებულზე), რაც მგზავრებს საშუალებას მისცემს, ფრენისას შეუფერხებლად ისარგებლონ სტრიმინგით, იმუშაონ და კონტაქტზე დარჩნენ ახლობლებთან.
შონ დოილი, British Airways-ის თავმჯდომარე და აღმასრულებელი დირექტორი, ამ ინიციატივას ავიაკომპანიის ტრანსფორმაციის გზაზე მნიშვნელოვან ეტაპად აფასებს.
“ჩვენ ვაგრძელებთ მომხმარებლის გამოცდილების გაუმჯობესებაზე ფოკუსირებას. Starlink-ის დანერგვა როგორც გრძელ, ისე მოკლე მანძილის თვითმფრინავებში ჩვენთვის და ჩვენი მომხმარებლებისთვის თამაშის წესებს ცვლის,” — აღნიშნა დოილმა.
დოილის თქმით, ახალი Wi-Fi უზრუნველყოფს “ელვისებურად სწრაფ, დაბალი ლატენტურობის” ინტერნეტს ბორტზე ყოფნის მთელი პერიოდის განმავლობაში, რაც შესაძლებელი იქნება ოკეანეებსა და შორეულ რეგიონებზეც კი. მისი თქმით, ეს იქნება Wi-Fi, რომელიც “სახლში ყოფნის შეგრძნებას მოგცემთ, თუნდაც 38,000 ფუტის სიმაღლეზე.”
Starlink-ის დანერგვა ხდება იმ ფონზე, როდესაც British Airways-ი აქტიურად ახორციელებს მასშტაბურ განახლებებს. ავიაკომპანიამ 1,000-ზე მეტი საინვესტიციო ინიციატივა განახორციელა, მათ შორისაა:
- ახალი გლობალური ლაუნჯ კონცეფცია მაიამისა და დუბაის ახალ ობიექტებში.
- 15 სრულად განახლებული ლაუნჯი (მათ შორის სიეტლში, ვაშინგტონში, სინგაპურში, გლაზგოსა და გატვიკში).
- 17 ახალი A320neo თვითმფრინავი, აღჭურვილი ბრიტანული მასალებით შექმნილი ახალი სალონებით.
- 36 ახალი თვითმფრინავის მიწოდება 2023 წლიდან.
- რეკორდული პუნქტუალურობა, რასაც ხელს უწყობს AI/მანქანური სწავლების ტექნოლოგიები.
