ბელარუსის ვიცე-პრემიერმა იური შულეიკომ თბილისში გამართულ ეკონომიკური თანამშრომლობის სამთავრობო კომისიის სხდომაზე განაცხადა, რომ ავიაკომპანია „ბელავია“ ზაფხულის პერიოდში თბილისის, ბათუმისა და ქუთაისის მიმართულებით ფრენების სიხშირეს გაზრდის. აღნიშნული გადაწყვეტილება განპირობებულია ქვეყნებს შორის არსებული პირდაპირი რეისების მაღალი დატვირთვით, რაც საშუალოდ 80 პროცენტს აღემატება.
მხარეებმა ხაზი გაუსვეს ტურიზმის სფეროში მზარდ დინამიკას და აღინიშნა, რომ 2025 წლის მონაცემებით, ბელარუსი საქართველოში ვიზიტორების რაოდენობით საუკეთესო ათეულში მე-7 ადგილს იკავებს, რამაც 150 ათასზე მეტი ტურისტი შეადგინა. ვიცე-პრემიერმა ასევე გამოხატა მზადყოფნა მინსკში სახალხო დღესასწაულის, „თბილისობის“ ჩატარების ტრადიციის აღდგენასთან დაკავშირებით და ხაზი გაუსვა სამეცნიერო-ტექნიკური, საგანმანათლებლო და კულტურული ურთიერთობების გაღრმავების მნიშვნელობას.
შეხვედრაზე განსაკუთრებული ყურადღება დაეთმო რეგიონთაშორის თანამშრომლობასა და ბიზნესწრეებს შორის კავშირების გააქტიურებას. ამჟამად საქართველოსა და ბელარუსის ქალაქებსა თუ რეგიონებს შორის 17 შეთანხმებაა გაფორმებული, რომელთა კონკრეტული ეკონომიკური შინაარსით დატვირთვა და ერთობლივი საგამოფენო ღონისძიებების ჩატარება 2026 წლის პრიორიტეტად დასახელდა.
