Azerbaijan Airlines-ის (AZAL) მგზავრებს მალე ექნებათ შესაძლებლობა, ისარგებლონ ბორტზე სწრაფი Wi-Fi-ით, რომელიც უზრუნველყოფს ინტერნეტთან წვდომას ფრენის დროს.
როგორც Report-ი ავიაკომპანიაზე დაყრდნობით იტყობინება, ამ სერვისის დანერგვისთვის AZAL-მა სტრატეგიული პარტნიორობა გააფორმა სატელიტური კომუნიკაციების გლობალურ ლიდერთან, Viasat Inc.-თან.
შეთანხმება გაფორმდა Dubai Airshow 2025-ზე, ერთ-ერთ უმსხვილეს საერთაშორისო საავიაციო გამოფენაზე. ხელშეკრულებას ხელი მოაწერეს Azerbaijan Airlines-ის პრეზიდენტმა, სამირ რზაევმა, და Viasat Inc.-ის საავიაციო გადაწყვეტილებების განყოფილების პრეზიდენტმა, დონ ბაკმანმა.
პარტნიორობის ფარგლებში, AZAL ოც ახალ საჰაერო ხომალდს – მათ შორის Airbus A320 ოჯახის თვითმფრინავებსა და შორ მანძილზე მფრენ Boeing 787-9 Dreamliner-ებს – Viasat Amaraსისტემით აღჭურვავს. Viasat Amara არის ახალი თაობის ტექნოლოგია ბორტზე სატელიტური კავშირისთვის, რომელიც უზრუნველყოფს მაღალ გამტარუნარიანობას, გაფართოებულ დაფარვას და სტაბილურ მონაცემთა გადაცემას ფრენის დროს.
„Viasat-თან თანამშრომლობა Azerbaijan Airlines-ისთვის კიდევ ერთი წინ გადადგმული ნაბიჯია ბორტზე სერვისის გაუმჯობესების მიმართულებით… მაღალსიჩქარიანი Wi-Fi-ის დანერგვით, ჩვენ შევძლებთ მგზავრებს კომფორტისა და კავშირის ახალი დონე შევთავაზოთ ფრენის დროს,“ — განაცხადა სამირ რზაევმა.
ბორტზე კავშირის გარდა, პარტნიორობა მოიცავს უსადენო ბორტგასართობი სისტემისდანერგვასაც. მგზავრებს შეეძლებათ საკუთარი მოწყობილობების გამოყენება ვიდეომასალის საყურებლად. პირველი ორი Airbus A320neo, რომელიც ავიაკომპანიის ფლოტს წელს შეემატა, უკვე ახორციელებს ფრენებს ამ სისტემით.
AZAL გეგმავს უფასო Wi-Fi წვდომა შესთავაზოს ბიზნეს-კლასის მგზავრებს და ლოიალობის პროგრამის უმაღლესი დონის მონაწილეებს.
ახალი ციფრული ინფრასტრუქტურა AZAL-ის განახლებული სერვისის კონცეფციის ნაწილი გახდება, რომელიც მიზნად ისახავს ყველა კატეგორიის მგზავრისთვის მოგზაურობის უფრო კომფორტული და თანამედროვე გამოცდილების შექმნას.
AZAL არის Skytrax 4 Stars პრესტიჟული რეიტინგის მფლობელი და არაერთხელ აღიარებულა World Airline Awards-ის გამარჯვებულად, როგორც „საუკეთესო რეგიონული ავიაკომპანია ცენტრალურ აზიაში და დსთ-ში“. ავიაკომპანია ახორციელებს სტრატეგიას, რომელიც დაფუძნებულია მარშრუტების ქსელის განვითარებაზე, ციფრულ ინოვაციებსა და მგზავრთა კომფორტის გაზრდაზე.
AZAL-ის სტრატეგიის ერთ-ერთი საკვანძო ელემენტია მდგრადი განვითარება; ის შეუერთდა გაეროს გლობალურ შეთანხმებას და მონაწილეობს IATA CO₂ Connect და IEnvA პროგრამებში, რაც ადასტურებს მის რეპუტაციას, როგორც პასუხისმგებლიანი და საიმედო პარტნიორის საერთაშორისო ავიაციაში.
