გერმანიის საჰაერო ტრანსპორტის ინდუსტრია სტაგნაციას განიცდის და მთავრობა ამას გაზრდილი გადასახადებით „აღწევს“. ხელისუფლებასთან ახლოს მყოფი Lufthansa აფრთხილებს, რომ სიტუაცია ძალიან მძიმეა.
მნიშვნელოვანია აღინიშნოს, რომ ევროკავშირში ფრენებზე გადასახადების შემოღება დიდი ხნის წინ დაიწყო. გადასახადის ოდენობა დამოკიდებულია ფრენის მანძილზე. მაგალითად, 2016 წლისთვის ბრიტანეთი თითო ბილეთზე 206 ევრომდე იღებდა. ავსტრიაში ტარიფები მაშინ 7-დან 35 ევრომდე მერყეობდა, საფრანგეთში კი – 7,75 ევრომდე. გერმანიაში მინიმალური კურსი 7,5 ევრო იყო. განსაკუთრებით გრძელი ფრენებისთვის კი ქვეყანა 42,18 ევროს იღებდა.
პანდემიის დროს გარკვეული გადასახადები შემცირდა. ზოგიერთ ქვეყანაში ავიაკომპანიებისთვის ასობით მილიონი ევროს გამოყოფაც კი დაიწყეს. ესპანეთში, Covid-ის მხარდაჭერის ღონისძიებები საფუძველიც კი გახდა კორუფციული სკანდალისთვის, რომლის დროსაც პრემიერ-მინისტრის მეუღლემ Globalia-ს ხელმძღვანელისგან (ფლობს AirEuropa-ს) მომსახურება მიიღო, რის შემდეგაც მისმა კომპანიამ მიიღო მილიონობით სარგებელი სახელმწიფოსგან.
მიმდინარე წლის 1 მაისიდან გერმანიის მთავრობამ ფრენებზე გადასახადები 19-24%-ით გაზარდა. საფასური ახლა მგზავრზე, მანძილის მიხედვით, 15,53-დან 70,83 ევრომდე მერყეობს. გადაწყვეტილება კლიმატთან დაკავშირებული ზრუნვით გაამართლა, თუმცა, ჟურნალისტების თქმით, ამ გზით მთავრობა ბიუჯეტის დეფიციტის შევსებას ცდილობს. გადაწყვეტილება ნეიტრალურმა ორგანიზაციებმაც კი გააკრიტიკეს.
საჰაერო ტრანსპორტის საერთაშორისო ასოციაციამ (IATA) ქვეყანა გააფრთხილა, რომ გადაწყვეტილება ექსპორტისა და ტურიზმის მკვეთრ შემცირებას გამოიწვევს, რაც თავის მხრივ შეამცირებს სამუშაო ადგილებს ისედაც სტაგნაციაში მყოფ ეკონომიკაში. ორგანიზაციის აღმასრულებელი დირექტორი უილი უოლში არ მოერიდა გადასახადების ზრდას “პოლიტიკური სიგიჟე” უწოდა, რომელიც გერმანიის კონკურენტული უპირატესობის გაუმჯობესებისა და მოგზაურობის სტიმულირების ნაცვლად, საჰაერო მოგზაურობის ინდუსტრიას ანადგურებს.
„გერმანიის მთავრობას, როგორც ჩანს, საავიაციო გადასახადების მიმართ არაჯანსაღი აკვიატება აქვს. გადასახადის გაზრდის გარდა, ის ასევე მხარს უჭერს ევროპული თვითმფრინავის საწვავის გადასახადს, რაც კიდევ უფრო გააძვირებს გერმანიაში ბიზნესის კეთებას ან დასასვენებლად წასვლას. ჩვენმა გამოკითხვამ აჩვენა სკეპტიციზმი მთავრობის „მწვანე გადასახადების“ მიმართ. ინდუსტრიიდან წაღებული ფული ნიშნავს, რომ მას ნაკლები თანხა აქვს დეკარბონიზაციის ღონისძიებებში ინვესტირებისთვის“, – განაცხადა უოლშმა.
აგვისტოს მეორე ნახევარში დაბალბიუჯეტიანმა ავიაკომპანია Ryanair-მა მოითხოვა გადასახადების შემცირება და უარის შემთხვევაში გერმანიის დატოვებით დაიმუქრა. კომპანიამ აღნიშნა, რომ ბერლინი ძალიან მკვეთრად ზრდის გადასახადებს და ეს ხდება იმ ფონზე, როდესაც ქვეყანაში ავიაციის სექტორი პანდემიის შედეგად მიღებული ზარალისგან არც კი აღმდგარა.
კომპანიამ გერმანიაში ფრენების რაოდენობის მკვეთრი შემცირება უკვე გამოაცხადა. მსგავსი გადაწყვეტილება მიიღო Eurowings-მა, Lufthansa-ს შვილობილმა კომპანიამ, რომლის 80%-ი გერმანიის მთავრობას ეკუთვნის. ბოლო მონაცემებით, კომპანია გერმანიის ათასზე მეტ ფრენას შეწყვეტს.
Lufthansa-ს აღმასრულებელმა დირექტორმა კარსტენ სპორმა განაცხადა, რომ ის “შეშფოთებულია” სიტუაციით. ის ეთანხმება მოსაზრებას, რომ გერმანიის სახელმწიფო აწესებს გადასახადებს, რომლებიც რეალობისადმი არაადეკვატურია და აზიანებს ავიაციას. მან ამ პრობლემის შესაძლო გადაწყვეტის შესახებ კომენტარი არ გააკეთა.
ცოტა ხნის წინ, დანიამ ასევე შემოიღო “კლიმატის გადასახადი” საჰაერო მგზავრობაზე 60 დოლარის ოდენობით.
