2040 წლისთვის ახლო აღმოსავლეთის აეროპორტებს 151 მილიარდი დოლარის ინვესტიცია დასჭირდებათ, რათა გაზრდილ მგზავრთნაკადს გაუმკლავდნენ.
ნდობა საჰაერო მოგზაურობის სამომავლო მოთხოვნაში, სხვა საკითხებთან ერთად, განპირობებულია 2029 წლისთვის 10 ავიაკომპანიის მიერ 795 ახალი თვითმფრინავის შეკვეთით.
დუბაი გეგმავს ალ-მაქტუმის საერთაშორისო აეროპორტის გაფართოებას და სურს ის გახადოს მსოფლიოში უდიდესი აეროპორტი, რომლის მგზავრთნაკადიც წელიწადში 260 მილიონი მგზავრი იქნება. პროექტის განხორციელების ღირებულება 35 მილიარდი დოლარია.
საუდის არაბეთი 50 მილიარდ დოლარს ჩადებს მეფე სალმანის საერთაშორისო აეროპორტის მშენებლობაში, რათა მან 2030 წლისთვის მოემსახუროს რეკორდულ 300 მილიონ მოგზაურს.
ქუვეითი აშენებს ახალ ტერმინალს, რომლის გახსნა 2025 წელს იგეგმება, ხოლო შარჯასსაერთაშორისო აეროპორტის ტერმინალის გაფართოება ერთი წლის შემდეგ უნდა დასრულდეს.
ანალიტიკური კომპანია Global Data-ის თანახმად, სპარსეთის ყურის რეგიონი უკვე ახორციელებს 48 აეროპორტის რეკონსტრუქციისა და გაფართოების პროექტებს, რომელთა საერთო ღირებულება 182,6 მილიარდი დოლარია. ინდუსტრიის პროგნოზების მიხედვით, გლობალური სამგზავრო მიმოსვლა 2042 წლისთვის 20 მილიარდ ადამიანს მიაღწევს.
როგორც ACI World Airport Traffic-ის ექსპერტებმა აღნიშნეს, რეგიონალური გადამზიდავები უკვე იღებენ მაღალ მოგებას: 2024 წელს მათ თითო მგზავრზე 23,1 დოლარი გამოიმუშავეს, რაც სამჯერ აღემატება გლობალურ საშუალო მაჩვენებელს.
მოსალოდნელია, რომ ახლო აღმოსავლეთის ავიაკომპანიები ამ წელს 5,9 მილიარდი დოლარის წმინდა მოგებას მიიღებენ, 2024 წელს 5,3 მილიარდ დოლართან და 2023 წელს 3,1 მილიარდ დოლართან შედარებით. რეგიონის შემოსავალმა ერთ მგზავრზე შეიძლება მიაღწიოს 23,9 აშშ დოლარს, რაც მნიშვნელოვნად აღემატება ამ წლის გლობალურ საშუალო პროგნოზს 7 აშშ დოლარს.
ინდუსტრიის გრძელვადიანი პროგნოზები მიუთითებს კიდევ უფრო მძლავრ ზრდაზე: 2052 წლისთვის გლობალური სამგზავრო მიმოსვლამ შეიძლება თითქმის 25 მილიარდ მგზავრს მიაღწიოს, რაც დაახლოებით 2,5-ჯერ აღემატება 2024 წლის მაჩვენებელს.
ახლო აღმოსავლეთისა და აზიის წყნარი ოკეანის რეგიონი, რომელიც მოიცავს 141 ქვეყანას, ერთობლივად 2040 წლისთვის გლობალური საჰაერო მოთხოვნის 58%-ს შეადგენს.
