Airbus-მა განაცხადა, რომ ევროპული სერვისის მე-4 მოდული (ESM-4) მზად არის დატოვოს ბრემენში (გერმანია) მდებარე კომპანიის ობიექტები და გაიგზავნოს NASA-ს კენედის კოსმოსურ ცენტრში, ფლორიდაში (აშშ).
ESM-4, რომელიც Airbus-მა ააგო ევროპის კოსმოსური სააგენტოს (ESA) სახელით, იქნება „Artemis IV“-ის მისიის უმნიშვნელოვანესი ნაწილი. ეს მისია ითვალისწინებს ასტრონავტების გაგზავნას „Gateway“-ს – კაცობრიობის პირველ მთვარის ორბიტალურ სადგურზე, რაც ახალ შესაძლებლობებს შექმნის სამეცნიერო კვლევისა და მარსზე ადამიანთა მისიებისთვის მომზადების თვალსაზრისით.
ევროპული სერვისის მოდულები (ESM) უზრუნველყოფენ „Orion“-ის კოსმოსური ხომალდის ფუნქციონირებისთვის აუცილებელ ყველა ძირითად კომპონენტს:
მოდულში ინტეგრირებულია 33 ძრავა, რომლებიც უზრუნველყოფენ ბიძგს და მანევრირების შესაძლებლობას.
NASA-ს მიერ მოწოდებული, მოდიფიცირებული „Space Shuttle“-ის ორბიტალური მანევრირების სისტემის ძრავა (OMS-E) გამოიმუშავებს 26.5 კილონიუტონ ბიძგს. ეს ძალა საკმარისია დედამიწის გრავიტაციული ველის დასაძლევად და მთვარის ორბიტაზე შესასვლელად.
რვა დამხმარე ძრავა გამოიყენება OMS-E-ის სარეზერვო ასლის სახით და ორბიტის კორექტირებისთვის.
კიდევ 24 პატარა ძრავა გამოიყენება კოსმოსში ორიენტაციის (დახრის კუთხის) გასაკონტროლებლად, რაც აუცილებელია დოკინგის (მიერთების) მანევრების დროს.
ESM-ი იღებს ენერგიას „Orion“-ზე დამონტაჟებული ოთხი მზის პანელისგან, რომლებიც ჯამში 11.2 კილოვატ ელექტროენერგიას გამოიმუშავებენ – ეს საკმარისია დედამიწაზე ოთხი ადამიანისგან შემდგარი ორი ოჯახის ელექტრომომარაგებისთვის.
სიმძლავრის დაახლოებით 10% საჭიროა თავად ESM-ისთვის, ხოლო დარჩენილი 90% მიდის ეკიპაჟის მოდულის ბატარეებსა და მოწყობილობებზე.
„Artemis I“-ის მისიამ აჩვენა, რომ მზის პანელებმა მოსალოდნელზე მეტი ენერგია გამოიმუშავეს, რაც სასარგებლო იქნება პროგრამის ევოლუციისთვის.
ეკიპაჟის მოდულის ბატარეებში შენახული ენერგია უზრუნველყოფს კოსმოსური ხომალდის კვებას იმ შემთხვევაშიც, თუ მზე დაფარულია, ასევე უკან უსაფრთხო დაბრუნებისას, როდესაც ESM-ი მოდულს გამოეყოფა.
ESM უზრუნველყოფს ასტრონავტებს წყლითა და ჟანგბადით, ასევე არეგულირებს კოსმოსური ხომალდის თერმულ კონტროლს.
ESM-ის მოდული დამონტაჟებულია ეკიპაჟის მოდულის ქვეშ და მათ ერთად შეადგენენ კოსმოსურ ხომალდ „Orion“-ს.
