ლატვიური ავიაკომპანია airBaltic საქმიანობის გაფართოებასთან დაკავშირებით, აქტიურად აცხადებს 200-მდე ვაკანსიას უმცროსი ბორტგამცილებლის პოზიციაზე. როგორც ცნობილია, ავიაკომპანია კადრების შევსებას 2026 წლის ზაფხულის სეზონისთვის გეგმავს.
ვაკანსიები ღიაა airBaltic-ის სამივე ბაზაზე ბალტიისპირეთის ქვეყნებში: რიგაში (ლატვია), ტალინში (ესტონეთი) და ვილნიუსში (ლიეტუვა).
airBaltic იწვევს განაცხადების მისაღებად ნებისმიერ მსურველს, ვისაც სურს საავიაციო ინდუსტრიაში კარიერის დაწყება, წინა გამოცდილების გარეშეც კი.
ყველა შერჩეული კანდიდატი გაივლის სრულად ანაზღაურებად, ორთვიან ტრენინგს და მიიღებს ბორტგამცილებლის სერტიფიკატს.
ავიაკომპანიის განცხადებით, ეს პოზიცია უზრუნველყოფს მოქნილ სამუშაო გრაფიკს, რომელიც მოსახერხებელია, მაგალითად, სწავლასთან შესათავსებლად.
airBaltic-ის ვებგვერდზე განთავსებული ინფორმაციის თანახმად, უმცროსი ბორტგამცილებლისთვის შეთავაზებული ხელფასი შეადგენს 1050-დან 1650 ევრომდე(გადასახადების გადახდამდე).
airBaltic-ის ნიჭის მოზიდვისა და განვითარების გუნდის ხელმძღვანელის, მარინა ვოლკოვას თქმით: „მომავალი ზაფხულის სეზონისთვის მზადების და ფლოტის გაფართოების პარალელურად, ჩვენ ვთავაზობთ 200 ვაკანსიას უმცროსი ბორტგამცილებლის პოზიციაზე მთელ ბალტიისპირეთში.“
შერჩეულ კანდიდატებს დაევალებათ თვითმფრინავის ბორტზე უსაფრთხოებასთან, მომსახურებასთან, გაყიდვებთან და ყოველდღიურ ფრენებთან დაკავშირებული მოვალეობები.
airBaltic-ში დასაქმებულია თითქმის 3000 პროფესიონალი და ავიაკომპანია აგრძელებს ახალი თანამშრომლების აქტიურ მოზიდვას სხვადასხვა პოზიციაზე.
