არაბთა გაერთიანებული საამიროების (UAE) დედაქალაქი აბუ-დაბი ემზადება პირველი მცურავი სასტუმროს მისაღებად. ობიექტი, რომელსაც Dutch Oriental კომპანია მართავს, 2025 წლის ოქტომბერში, იას მარინას სანაპიროზე (Yas Marina) გაიხსნება.
ხუთვარსკვლავიანი სასტუმრო “Orchid Overnight”, რომელიც სუპერ-იახტის კლასიფიკაციას ატარებს, სტუმრებს 31 ნომერს სთავაზობს. მათ შორისაა: 24 გაუმჯობესებული კომფორტის სუიტი; 4 VIP ნომერი; 3 სამეფო ლუქსი (60 კვ.მ ფართობით, მისაღები ოთახითა და ჰიდრომასაჟის აბაზანით).
სტუმრებისთვის ხელმისაწვდომი იქნება ოთახების ინტელექტუალური მართვის სისტემა, ღია ტერასა შეზლონგებითა და სასადილო ზონებით. ბორტზე კვება სრული პანსიონის სისტემით არის ორგანიზებული.
იახტა-სასტუმრო მომხმარებელს სთავაზობს კრუიზებს მზის ჩასვლისას და ექსკლუზიურ ვახშმებს. მისი დაჯავშნა ასევე შესაძლებელია კერძო და კორპორაციული ღონისძიებებისთვის, კონსიერჟის სრული სერვისით. განთავსების ღირებულება იწყება დღე-ღამეში 990 დირჰამიდან (დაახლოებით $270-ის ეკვივალენტი).
“Orchid Overnight” შეუერთდება UAE-ში არსებულ სხვა მცურავ სასტუმრო პროექტებს, როგორიცაა “Queen Elizabeth 2” დუბაიში და სამომავლო “Kempinski”-ის წყლის სასახლე, რომელიც ამჟამად მშენებლობის პროცესშია.
