სომხეთის რესპუბლიკამ 41 ხარვეზიდან 40 აღმოფხვრა, რამაც გამოიწვია მისი ევროკავშირის საავიაციო „შავ სიაში“ მოხვედრა, ბოლო ხარვეზის აღმოფხვრა კი მიმდინარე წლის დეკემბერში იგეგმება. აღნიშნულის შესახებ ინფორნაციას https://ge.armradio.am ავრცელებს.
ამის შესახებ პარლამენტის კომიტეტების გაერთიანებულ სხდომაზე 2025 წლის სახელმწიფო ბიუჯეტის კანონპროექტის წინასწარი განხილვისას განაცხადა ტერიტორიული მართვისა და ინფრასტრუქტურის მინისტრმა გნელ სანოსიანმა.
მან აღნიშნა, რომ ბოლო ხარვეზი ინსპექტორებისა და სპეციალისტების ნაკლებობას ეხება.
„დეფიციტის ნაწილი შეივსო და ახლა კიდევ რამდენიმე სპეციალისტი გადამზადების ფაზაშია, რომელიც დეკემბრის შუა რიცხვებში დასრულდება“, – განაცხადა მან.
მინისტრმა ხაზგასმით აღნიშნა, რომ ოქტომბერში სომხეთმა უკვე მიმართა ევროკავშირის საავიაციო პარტნიორებს სამუშაო გეგმის დასაწყებად, რომლითაც სომხეთის ავიაცია გამოვა „შავი სიიდან“. მისი თქმით, 13 ნოემბერს იგეგმება ევროპელ პარტნიორებთან სპეციალური კონსულტაცია, რომლის დროსაც ჩამოყალიბდება საგზაო რუკა, რათა დასრულდეს სომხეთის „შავი სიიდან“ გასვლის პროცედურა.
„დიდი იმედი მაქვს, რომ პრობლემები მოვაგვარეთ, ასევე იმის გათვალისწინებით, რომ წელს სომხეთში ჩატარდა ICAO (სამოქალაქო ავიაციის საერთაშორისო ორგანიზაცია) აუდიტი, რომელიც მაღალი რეიტინგის მქონე საერთაშორისო ორგანოა. აუდიტის შედეგებმა აჩვენა, რომ ბევრი ხარვეზი აღმოვფხვერით“, – დასძინა მან.
მისი თქმით, ევროპელი პარტნიორები მომავალში სომხეთს ეწვევიან შესაბამისი კვლევების ჩასატარებლად.
