უკრაინული ავიაკომპანია Skyup Airlines-ი საქართველოს ავიაბაზარზე რეგულარული რეისებით ბრუნდება. ავიაკომპანია, 2020 წლის მარტიდან საქართველოს მიმართულებით მხოლოდ ჩარტერულ ფრენებს ასრულებდა და დაწესებული რეგულაციების ფონზე მგზავრების მომსახურების უფლება მხოლოდ თბილისი-კიევის რეისებზე ჰქონდა.
როგორც AviaNews-ს საქართველოში Skyup Airlines-ის გენერალური აგენტი კომპანია “ავიაქსელში” განუცხადეს, Skyup Airlines-ი კიევი-თბილისი-კიევის საჰაერო ხაზზე რეგულარულ ფრენებს 4 თებერვლიდან განაახლებს. ავიაკომპანია რეისებს კვირაში 2 სიხშირით, ყოველ ხუთშაბათს და კვირას განახორციელებს.
შეგახსენებთ, რომ Skyup Airlines-ის ბილეთების შეძენა შესაძლებელია, როგორც ავიაკომპანიის ვებგვერდზე, ასევე Skyup Airlines-ის გენერალურ აგენტ კომპანია “ავიაქსელში” და თავად ავიაკომპანიის ვებგვერდზე. “ავიაქსელში” შესაძლებელია ასევე იმ მიმართულებებზე ტრანზიტული ბილეთების შეძენა, სადაც Skyup Airlines-ი ასრულებს ფრენებს.
გაითვალისწინეთ, რომ მსოფლიოში COVID-19-ით ინფიცირების შემთხვევების მკვეთრი ზრდის ფონზე, სახელმწიფოების მიერ პერიოდულად იცვლება სასაზღვრო შეზღუდვები და სანიტარული მოთხოვნები, რაც ასახვას ჰპოვებს ავიაკომპანიების გადაწყვეტილებებზე ამა თუ იმ მიმართულებით საჰაერო მიმოსვლის გაგრძელების ან განახლების კუთხით.
გამომდინარე იქედან, რომ COVID-19 პანდემიის პირობებში ავიაციის სექტორისთვის ვითარება რთულად პროგნოზირებადია, მგზავრებმა მოგზაურობის დაგეგმვის დროს სიფრთხილე უნდა გამოიჩინონ და ყურადღებით გაეცნონ დანიშნულების ქვეყნის მიერ დაწესებულ რეგულაციებს, ავიაკომპანიების შეტყობინებებს, ოფიციალურ წყაროებზე განთავსებულ განცხადებებს და განრიგებს.
